Despues di 6 anja di gobierno di Mike Eman e unico conclusion cu nos por saca ta cu e gobierno aki ta uno ANTI pueblo. E gobierno aki no solamente a derocha y fiesta cu placa di pueblo y caba cu nos pais sino awe ta castigando cu pueblo cu un sin fin di medida. E realidad di nos pais awe ta uno hopi tristo. Famianan ta pasando den dificultad pa cumpli cu nan obligacionan, no tin placa pa paga awa, no tin placa pa paga coriente y tur luna mama y tatanan di famianan ta biba den angustia. Tur indicador cu tin ta duna un bista den ki situacion nos pais ta den actualmente. Recientemente WEB a manda cobra 12,000 famia cu tin cuenta retrasa na WEB y a dunanan solamente 2 dia pa cumpli cu e pago sino lo corta nan awa. Esaki ta e explosion social cu a wordo crea pa Mike Eman. Lesa bon, 12.000 famia cu tin cuenta di awa atrasa y esaki ta 1/3 parti di e clientela di Web. WEB a hedge y costa nos pueblo miyones di florin y impedi nos pueblo un rebaho di coriente di 25%. WEB ta sponsor tur evento "Green" di Mike Eman y awor cu pueblo NO por paga kier pone cuchiew na carganta di pueblo. Esaki si ta un gobierno ABUSADOR di pueblo y asina mes ta sigui castiga tur hende cu MEDIDA! No solamente tin 12,000 famia cu no por pagan a cuenta di awa sino 40% di e pueblo no por a paga nan number di auto. Loke ta mas alarmante ya e hecho cu 30% di nos hobenan ta desemplea. Esaki ta 1/3 parti di nos hobenan cu ta sin trabou, no ta bayendo scol y ta buscando otro cosnan pa haci. Gobierno ta bon na altura di tur e indicadornan aki pero nan no ta haciendo nada pa soluciona e problemanan aki. Al contrario, cada dia nan ta purba pa saca mas placa for di cartera di nos pueblo. Ta basta cu medidanan" , esaki despues cu a tuma nota cu mas cu 12 mil famia no por paga na recibo di awa. " Esaki no ta normaal. Nos no por lage bira normaal mas". E pueblo ta cansa di tanto medida y bida ta mucho caro y e salario no ta yega. Na okt 2014 e tarifa di awa y coriente a subi cu 15% y esaki a crea hopi problema financiero pa famianan. Prijs di huur di cas ta caro y gobierno aki no a traha ningun cas social. Tin 28.8% di nos hoben adulto sin trabao y no por yuda nan tata y mama.  Gobierno di Mike Eman ta responsabel pa e crisis social cu nos ta aden. Mas cu 900 mucha ta bay school sin un desayuno y tin miseria den nos pais. Pueblo kico ta pasando? A yega e ora pa para tur medida. Tin mucho ladronicia y atraco casi tur dia. Tin cu pone ordo den e desordo aki. A yega e ora pa trese un cambio y manda e mal Gobierno di Mike Eman cas! Tin solucion pero mester tin boluntad loke e gobierno aki no tin. Envez cu ta sinta viaha, derocha placa di pueblo na eventonan green, paga miyones di placa na pueblo na companianan pa haci promocion y brainwash pueblo mester usa e fondonan aki caminda ta necesario y tin prioridad. Actualmente prioridad ta traha un scol Mavo/Havo/VWO na Noord, traha casnan social, mehora poder di compra, percura pa tin un cuido ideal pa nos grandinan y inverti den complehonan deportivo. Un gobierno cu ta traha pa pueblo por logra esakinan pero Mike Eman y su gobierno a demostra incapaz pa soluciona problemanan y nan ta un gobierno anti pueblo. Un pueblo no por sufri tanto y asina mes e gobierno ta sigui castiganan!

Expresionnan haci den e articulo aki no necesariamente ta refleha opinion di ArenaPoliti.co