Mal maneho financiero ta pone cu atrobe Gabinete Eman mester di placa pa asina por cubri deficitnan den aña 2015. Ta pesei Gabinete Eman a presenta den e presupuesto supletorio cu dentro di poco e lo ta bendiendo 5 edificio di gobierno y ta spera di por cash in un suma di 11 miyon florin. E edificionan aki ta entre otro Hulpbestuurskantoor Noord, ex warda di polis na Wilhelminastraat, edificio di ex Domeinbeheer y edificio di Ministerio Publico. Obviamente e acto aki ta uno causa pa ansha di placa y ta sigur cuestionabel den tur aspecto cual nos lo splica en corto den e comunicado aki.

Dos di e 5 edificionan aki ta den capital di Aruba y centro di comercio cual ta nifica cu kizas nan tin hopi balor riba mercado di real estate. Probablemente e balor di e dos edificionan aki por ta ekivalente of hasta surpasa 11 miyon florin. Na e otro banda tin posibilidad cu propiedadnan tin un balor hopi abou mes ora di taxeer. Pero pa no specula fraccion di MEP a hasi peticion pa ricibi e taxatierapportnan di cada un di e edificionan. Ora di haya esakinan como inzage a resulta cu e propiedadnan aki a solamente wordo balota door di 1 solo taxateur. Logicamente esaki ta trece duda cune den e balornan cu a wordo poni riba papel pasobra lo tawata mas transparente y menos dudoso si tawatin mas cu 1 taxateur y cu ongeveer e mesun taxatiewaarde.

Bandi di e hecho cu e suma di 11 miyon florin pa 5 propiedad ta hopi cuestionabel. Mester enfatisa tambe cu e no ta un secreto cu gobierno semper tawatin problema cu espacio y hopi biaha tin mas cu un departamento "geprop" den un solo edificio cu tur e consecuencia negativo pa e funcionamento. Dus e ta un necesidad di parti gobierno pa por tin espacio pa por traha y baha gasto innecesario. Ta pesei e ta tristo pa mira un gobierno cu no ta mira mas leu cu su nanishi pasobra sin bo propio edificionan ta nifica cubo tin cu bai huur cu consecuencia cu e gastonan aki ta halto atrobe.

Otro punto cu mester tene cuenta cune ta projectonan ppp cu Gabinete Eman ta adicto na dje. E argumento cu gobierno ta usa ta pasobra mester duna pueblo servicio. Pero di otro banda ta lubida cu e servicio ey ta mara na un cadena di obligacion riba termino largo y cu ta costa hopi mas placa compara si bo tin bo propio edificio. Durante e reunion cu a trata presupuesto supletorio 2015 e minister a indica cu tur edificio lo ta den un estado deplorabel y cu lo tuma hopi placa pa renobanan pero esaki pa nos ta un ponencia dudoso y debatibel. Cu otro palabra si bo mester opta pa renovacion mes di un di e edificionan verval esaki toch lo ta hopi mas conviniente economicamente compara cu construccion di un nobo y lo ta sin obligacion financiero di 20-30 aña largocu de facto mayoria biaha ta cai riba lomba di pueblo. Un ehempel simpel ta e MFA sin kita afor cu e edificio ta uno bunita no ta algo pa hustifica y sigur ta cuestionabel tur loke tin cu bai wordo paga. Den caso specifico aki gobierno di Aruba tin cu paga pa 25 aña largo un suma di 2.5 miyon florin totalisando 62.5 miyon. Por mira e tabel cu gobierno mes a suministra na CBA. (Tene na cuenta cu te dia di awe no a modifica e suma di projectonan) Renobacion di un di e propiedadnan cu lo wordo bendi por a costa substancialmente menos comparando e cu suma cu tin cu paga na por ehempel un MFA (obligacion di projectonan ppp) of evita y reduci gastonan extra di huur.

E punto central di e comunicado aki ta cu gobierno ta papia di baha gasto di huur pero ne mesun momento ta draai bende su propiedad loke por a spaar e hopi miyones na gasto di huur of di sera obligacionan largo di projectonan ppp. Ademas e ta cabi crea un chaos pa e departamentonan cu no por funciona drechi djis pa capricho di parti un gobierno cu kier djis haya un "quick buck" placa facil pa tapa e deficiencia den su maneho financiero cu falta placa!

Expresionnan haci den e articulo aki no necesariamente ta refleha opinion di ArenaPoliti.co