ORANJESTAD – Na momento cu Nacionnan Uni a tuma e decision pa organisa un Conferencia di Public Private Partnership hunto cu Aruba, ya caba Ministerio di Infrastructura di Minister Benny Sevinger tabata preparando un evento similar. Mirando e tema comun, a dicidi di uni e dos encuentronan. Esaki ta nifica cu riba dianan 22, 23 y 24 di maart awor lo tin e P3A Conference  y tambe un side-event masha importante.

Durante un conferencia di prensa diahuebs merdia, Prome Minister Mike Eman hunto cu Minister Benny Sevinger a anuncia e conferencia importante aki den presencia di M. Gyan Chandra Acharya, Under-Secretary-General y Alto Representante pa ‘Least Developed Countries, Landlocked Developing Countries and Small Island Developing States’.

Mas cu 37 estado lo ta na Aruba, Minister Sevinger a trece dilanti, pa discuti Proyectonan PPP den diferente sector – salud, agricultura, infrastructura, etc. – pero ta importante pa Aruba na mes momento tene un “side event” cu “nos tabata planeando pa basta tempo caba. E “side event” ta pa tur e islanan y durante esaki ta anuncia proyectonan cu ta importante pa tur e estadonan,” e mandatario a trece dilanti.

Un evento asina, Minister Sevinger a bisa, ta importante ya cu islanan chikito no ta hunga un rol grandi den proyectonan eminente manera paisnan grandi. Pa atrae financiadonan internacional ta masha importante pa bini cu proyectonan bon y interesante pa institucionnan financiero, proyectonan cu ta carga aprobacion di comunidad. Aruba, a pasa den tur e fasenan di consulta, entre otro cu comunidad, pues e pais tin un experiencia grandi pa comparti cu otro islanan. Den e perspectiva ey, a discuti cu Nacionnan Uni con por comparti e conocemento aki cu tur otro isla rond mundo. Cu esaki den mente, e PPP Conference lo tene un “side event”. Meta ta pa e islanan participantenan presenta proyectonan na un audiencia mas grandi – companianan di construccion, banco, arkitectonan, abogadonan y institucionnan financiero. Tur proyectonan grandi cu lo bay wordo realisa den e proximo añanan lo keda presenta den e “side event”. Esaki tin su bentaha, ya cu e compania y institucionnan no mester biaha pa cada un di e islanan y mira e proyectonan cu Gobiernonan ta trahando riba nan. “Nan lo mira nan tur na Aruba. Ta importante pa e islanan, pasobra nan por combersa y reuni cu mas cu un banco y instituto financiero na mesun momento. E institucionnan tambe por mira cual ta e proyectonan den cual nan por participa.”

Finalisando e mandatario a bisa cu e tabata un dia importante pasobra a anuncia un evento grandi cu ta importante no solamente pa Aruba pero tur e islanan di mundo.

Expresionnan haci den e articulo aki no necesariamente ta refleha opinion di ArenaPoliti.co