AVP: Prome Minister Mike Eman a capta atencion di hobennan di CDA cu un charla dinamico den Cafe Politico na Den Haag
ORANJESTAD – Durante bishita di Prome Minister Mike Eman na Den Haag, el a probecha pa reuni cu un grupo di e ala hubenil di CDA. Den Cafe Politico di e seccion hubenil di CDA e mandatario a bin cu un reto pa e hobennan. Nan a wordo reta pa pensa riba e motibonan pakico ta importante pa traha hunto den Reino Hulandes.
Manera ta conoci, desde cu su partido a drenta gobernacion na fin di aña 2009, Prome Minister Eman a traha pa trece mas union y cooperacion entre e partnernan den Reino, dunando e miho ehempel di loke Aruba ta haciendo pa logra un brug entre Hulanda y Caribe.
Interesante den e discurso aki tabata cu e mandatario a splica e hobennan cu Reino no por keda steun solamente riba historia. E parti di historia tin su balor, pero nos bista mester ta principalmente dirigi riba futuro di Reino. E sosten pa esaki ta coriendo peligro di cay afo, si no duna bida nobo na Reino y si no haci miho uzo di e balor agrega cu tin pa ta un miembro di e Constelacion aki”, tabata palabranan di Prome Minister Eman.
Pa duna mas contenido na e relacionnan di Reino, no tin miho forma pa haci esaki cu den propio seno. El a duna e ehempel di su partido cu tin e mesun principionan cristian-democrata cu CDA y cu ora su partido (AVP) a sufri un derota pisa den eleccion di 2001, el a busca conseho y ayudo cerca CDA.
“CDA a mustrami cu nos no tabata hiba un bon oposicion door di solamente grita cada biaha cu Gobierno di e tempo ey tabata haciendo tur cos robez. E conseho tabata pa pone mas atencion riba contenido y presenta plannan alternativa. Esey tabata algo nobo den politica Arubano y mi mester bisa: e forma ey di hiba politica ta mas inspirador cu solamente grita cu e otronan no ta haci nada bon,”Eman a bisa. Naturalmente a bini e pregunta cu si awo e por tin un conseho pa CDA cu ta sinta den banki di oposicion y con pa sali di e situacion aki. Su reaccion tabata cu “ta temponan di hopi turbulencia na Europa, e tendencia pa populismo ta grandi. Mi ta conseha pa no cay den esaki, e lo no conduci na solucionnan duradero. Keda na loke ta e fuente di inspiracion pa nos di pensamento cristian-democrata. Un di e principal puntonan ta pa traha pa nos prohimo.”Esaki, el a sigui splica, ta wordo traduci na Aruba den un maneho cu ta dirgi den un miho bida, un miho bienestar general y di un forma mas husto, pa un y tur.
Despues di e charla, e hobennan a rondona e mandatario y a keda cu varios pregunta cu nan tabata kier a haci'e y puntra su opinion riba diferente tema. Tabata un encuentro fructifero.
Expresionnan haci den e articulo aki no necesariamente ta refleha opinion di ArenaPoliti.co