Segun Andin Bikker gobierno no tin un vision structura pa loke ta trata salubridad y nos tin un ehemplo di esaki ora cu gobierno ta evaluando e ciere di un departamento di SABA.

Gobierno ta maneha solamente e parti curativo unda un pacient ta bay docter cu sintomanan, e ta haya receta, of si tin cu opera algo AZV ta cubri, pero nan ta lubidando e cuido pa esnan cu ta birando grandi y mester di cuido intensivo, sea nan ta hayando Alzheimer, entre otro y cu mester wordo interna den un cas di cuido.

E cuido aki no ta cay bao di AZV ni tin un ley tampoco cu ta regula e parti aki segun Andin Bikker y fuera di esey nan pension ta wordo aloca pa e institutonan aki pa yuda cubri gastonan y tin biaha e placa aki tampoco no ta yega y awor gobierno kier cumpra cuido manera sistema Hulandes. Un sistema cu ta den discusion na Hulanda segun un canal Hulandes pasobra e no ta funciona.

Nan a pasa e maneho y gastonan pa e municipionan (Gemeenter) y esakinan a aplica un otro filosofia unda cu e grandinan mester a gasta nan placa di spaar pa paga pa nan cuido, y awor nan ta desampara y no sa kico pa haci.

Na Aruba tambe indirectamente gobierno ta bay pone e gastonan aki riba famia of e propio pacient cu mester wak di unda saca e fondonan pa cuido di nan grandinan. Esaki PDR a puntra dia a tempo cu a bin cu aumento di edad di pension y a puntra minister si e tin un plan integral pa henter salubridad y un plan di vitalidad, pasobra Hulanda si a bin cu un plan di vitalidad manera mester haci ora subi edad di pension di 60 pa 65. Pero den esaki y den maneho preventivo gobierno ta laga masha hopi mes di desea, segun Andin Bikker.

Expresionnan haci den e articulo aki no necesariamente ta refleha opinion di ArenaPoliti.co