Setty Christiaans-Yarzagaray (MEP): Kico kiermen un subida di salario minimo cu 2.5% realmente?
Por a tuma nota di un anuncio di e gobierno actual indicando cu nan a bay di acuerdo pa subi salario minimo cu 2.5%. Pero lo ta bon pa para keto un rato y analisa kico e subida di salario minimo ta significa realmente. Si wak den e tabel adhunto por tuma nota cu salario minimo a subi porfin despues di 3 aña y alabes pa di 3 biaha apenas desde di gabinetenan Mike Eman den su di 7 aña di gobernacion. Alabes e tabel ta ilustra e suma di placa cu salario minimo a subi desde aña 2000 te cu aña 2016.
Un subida di 2.5% riba salario minimo kiermen 40.90 florin extra pa luna riba salario minimo den 2016 mientras cu ta for di aña 2013 salario minimo a experencia un subida di 32.10 florin.
Den un articulo recien di e gobierno actual a emiti, por a nota cu ta bisa cu no ta nada straño e subida di salario minimo aki paso e gobierno aki ta traha na bienestar general di tur ciudadano, principalmente pa esnan vulnerabel. Si enberdad e gobierno aki ta traha pa e grupo aki principalmente, ta dicon e gobierno actual a subi salario minimo cu apenas 134.70 florin desde aña 2009 pues den 7 aña di gobernacion? Si enberdad nan tin e ser humano central y ta traha pa e grupo mas vulnerabel, ta dicon e gobierno actual aki ta hisa salario minimo cu 40.90 florin pa luna pero den mesun luna mester paga 25 florin pa piki sushi, mester paga pa parkeer si bay of ta traha den area di Oranjestad, y si mester tuma bus, prijs di transporte publico tambe a subi, si tin yiu(nan) mester paga extra na scol, mester paga 2% di BAZV riba TUR cos paso gobierno no ta cumpli cu su pagonan manera mester ta na AZV siendo cu nos si mester paga siendo cu ta cuanto remedi ya no ta wordo cubri mas pa AZV. Sin conta si tin famia tin hende grandi den casnan di anciano of muchanan cu limitacion, cu awor ta famia mester aporta mas pa nan cuido y trankilidad paso gobierno ta baha of kita subsidio na e instancianan aki. Pues por conclui cu subi salario minimo di un banda pero di otro banda tin asina tanto otro gasto cu a bin extra den cartera di cada ciudadano, cu no por bisa realmente cu esaki ta un maneho na bienester general of pa drecha e poder di compra. Mas bien e ta un compensacion bek na esnan di menos recurso pa gastonan ya existente probablemente pa por asina disminui e efecto di pobresa na Aruba. Ofreciendo un reparatie toeslag di 75 florin maximo tampoco no ta un solucion concreto pa yega na un balans den nos comunidad pa tur reto financiero cu nos comunidad tin di enfrenta pa mantene cabes na halto. Mas bien e toeslag aki ta fungi pa suprimi efectonan financiero cu comunidad ta sinti como resultado di mal maneho financiero di pais Aruba. Danki Dios cu mundialmente prijs di gasolin a experencia bahada cu den e aspecto aki pueblo por sinti sikiera un poco alivio den prijs di gasolin, si no esaki tambe ta un otro reto financiero den cartera di pueblo.
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...