Partido Democracia Real a haci pregunta na Parlamento, riba e beach policy nobo cu a wordo anuncia ampliamente e siman aki, entre otro, pa Minister di Turismo Otmar Oduber.

El a splica cu den Parlamento nan ta haya diferente persona, entre otro, propietarionan di negoshinan di water sport y di hotelnan, cu ta puntra na unda e beach policy aki a wordo publica, pasobra nan no ta haye ningun caminda, y PDR tampoco.

Segun Bikker PDR a bay coba tur caminda y a puntra otro fraccionnan si nan a ricibi’e pero tampoco nan no tine.

PDR no a haya e policy den ningun website ni di gobierno, ni di DIP tampoco.

Esun cu ta aparece ta e mesun di 2014 diferente negoshi y operador di hotel tabata tin problema cune, y gobierno a bisa cu nan lo atende cu esaki y tempo  despues nan a bisa cu nan a bin cu un maneho nobo.

Pero akinan ademas ta bisa cu gobierno ta bay papia cu tur esnan cu ta traha cu water sport, doñonan di hotel y tur esnan cu ta deal cu e beach pa nan haya informacion.

Bikker a papia cu diferente hende cu no ta compronde, y cu ta spera cu lo bin cambio [a mehora e politica nobo di maneho di beach, y cu por mira esaki riba e website di gobierno y pesey PDR a haci pregunta pidiendo e minister pa por fabor informa parlamento, na ki caminda, exactamente, e maneho di beach a wordo publica pasobra ta wordo pidi hende pa pidi permiso nobo pa opera den beach.

Su pregunta ta, a base di cual maneho nan ta aplicando, y esey ta e pregunta cu netamente PDR ta hayando, y como representante di pueblo Parlamento su deber ta trece claridad y usa un di e instrumentonan cu nan tin, cu ta haci pregunta na e minister pa e trece claridad.

Pa termina Bikker a bisa cu ta un principio di bon gobernacion cu un maneho mester ta publica pa pueblo sa na kico e mester atene su mes na dje.

E parlamentario a subraya cu no por papia di un maneho di beach y saca potret masha bunita, pero lague hinca den un lachi. No ta asina democracia ta funciona, y p’esey PDR kier sa ki caminda e por haya e publicacion aki.

Expresionnan haci den e articulo aki no necesariamente ta refleha opinion di ArenaPoliti.co