Proyecto Smart Community Aruba 

ORANJESTAD - Minister de Meza tabata presente na ceremonia di Smart Community Aruba na Kibaima unda ta bay construi 20 vivienda cu ta bay funciona di e forma mas sostenibel posibel. Smart Community Aruba ta parti di vision 2020 cu Gabinete Mike Eman a drenta gobernacion cu ne na 2009. Un vision cu ya desde oposicion tabata un punto evidente pa wordo introduci na Aruba. Vision 2020 a haci Aruba conoci rond mundo y den su afan pa logra e meta aki - Aruba sostebibel 100% na 2020 -  gobierno ta bayendo dilanti cu stapnan grandi.

Minister de Meza tabatin palabranan di gran elogio pa Premier Eman pa a pusha y sigui dilanti cu  vision 2020 cu ta pone Aruba riba mapa mundial y ta wordo reconoci internacionalmente. E vision ta contagioso y mas y mas compania y institutonan ta trahando duro pa yuda logr'e na 2020. De Meza a bisa cu e Smart Community ta un living lab. "Un luga unda nos ciudadanonan ta biba den dje y participa den loke e comunidad aki tin di ofrece. Despues por saca hopi informacion di e experiencia di e habitantenan. Informacion cu ta bay yuda nos pa haya sa con biba sostenibel y con traha casnan den futuro a base di loke Smart Community Aruba ta siña nos."

De Meza a splica cu e aspecto energetico ta keda cu su retonan grandi. El a recorda tur presente cu prijs di azeta ta hopi bou, aunke cu pronosticonan a indica cu e prijsnan aki mester ta hopi mas halto. "Esaki ta loke ta yama geo politico y no un decision basa riba demanda y produccion. Demanda y produccion ta locual ta usa pa dicidi e prijs, pero aki ta razonnan geo politico a pone loke tin awe riba mercado. Esey ta keda un reto. Un reto pa mantene e prijs abou y ta bira un reto mas grandi ora e prijs subi bay ariba. Medio-ambiente ta hopi importante den e proyecto aki y con nos ta bay om cu energia." De Meza a bisa cu Aruba como isla chikito mester deal cu loke mercado mundial ta brinda. Ta pesey mes cu e proyecto Smart Community Aruba ta hopi importante pa Aruba prepara nos mes. "Nos no mester warda riba otronan, pasobra e ora e tempo ta pasa bay y nos ta keda atras. Aruba ta un frontrunner den sostenibilidad na mundo y ta wordo reconoci pa esaki. Arubianonan semper a haci cosnan grandi den mundo y nos lo sigui haci cosnan grandi den mundo." Cu e palabranan inspirativo aki Minister de Meza a termina su discurso cortico.

Expresionnan haci den e articulo aki no necesariamente ta refleha opinion di ArenaPoliti.co