Parlamentario di MEP, Sr. Chris Romero, a denuncia for di siman pasa caba cu e proyecto Green Corridor lo costa Aruba 292 Miyon, Avenida Watty Vos lo costa 440 miyon, cu ta suma na un total di 732 miyon florin.
E Parlamentario a enfatisa cu nos Promer Minister ta papia constantemente di sostenibilidad, pero realisticamente sr. Eman no ta hibando un maneho basa riba sostenibilidad.

Na un manera hopi simpel, sr. Romero a splica cu sostenibilidad ta ora cu bo ta protege nos naturalesa y no ora cu bo ta destrui esaki pa bay over na ehecuta proyecto. E Parlamentario tambe a splica cu ora bo referi y bisa di aplica un maneho basa riba sostenibilidad, bo mester por cumpli cu algun exigencia promer cu bo core grita sostenibilidad.
Sostenibilidad ta dividi den 3 factor: sostenibilidad di medio ambiente, sostenibilidad economico y esun social.
Cualkier persona cu dos placa di sinti por mira cu Gobierno di sr. Mike Eman no ta hibando un maneho sostenibel.

Henter pueblo ta y tabata testigo, con na un manera hopi pura y sin consulta cu ningun grupo ambiental, a roza gran parti di nos naturalesa pa acomoda e caretera di 2 via di Airport t'e cu Pos Chikito.
A hasi esaki obviamente sin planifica e trafico diario di miles di empleado cu ta bin Playa y bay San Nicolas tur dia.
Sr. Romero a condena e Gobierno di AVP pa a rosa e poco naturalesa cu tabatin, haciendo un daño irreparabel na nos naturalesa.

E Parlamentario a remarca cu economicamente tampoco e proyectonan aki ta sostenibel, como cu e actividad economico y 40 cupo di trabao cu a keda crea, lo desaparece despues cu finaliza e proyecto.

Sr. Romero a duna un ehempel di un cas cu AVP ta manehando malo y kier hasi luho door di traha un pool, sinembargo e situacion financiero no ta permiti pa malgasta placa y esey ta demostra cu AVP ta un partido irresponsabel, manehando un Gobierno insostenibel.
E Parlamentario a bisa cu e compromiso cu MEP tin cu e pueblo di Aruba, ta di traha na un manera responsabel y berdaderamente sostenibel cu e placa di pueblo, algo cu partido AVP no a logra hasi den casi 7 aña di gobernacion.

Expresionnan haci den e articulo aki no necesariamente ta refleha opinion di ArenaPoliti.co