Gobierno mester pone mas atencion na ensenjansa 

ORANJESTAD - Lider di MEP Evelyn Wever-Croes a expresa su preocupacion cresiente pa e falta di atencion di parti di gobierno riba e tereno di ensenjansa. “Minister Dowers a neglisha ensenjansa totalmente, pero e minister actual ta peor ainda. Y ora bo kere cu e prome minister por pone orden, bo ta mas equiboca, pasobra su prioridadnan ta den su biahenan pa representa gobierno di Hulanda den exterior. Tin asina tanto problema riba e tereno di ensenjansa y e falta di accion di parti di gobierno ta pone e problemanan escala den tempo rapido.

E problema di diploma di HAVO/VWO ta uno hopi critico, un problema cu por perhudica centenares di hoben, y ta parse cu e gobierno aki no tin ningun interes den atende cu e problema aki. Mi no ta comprende con e ministernan encarga por drumi trankil sabiendo cu nan ta perhudicando nos futuro generacion. Ta parse cu nan ta hasi esaki deliberadamente. Otro problema ta e hecho cu gobierno kier forsa alumnonan di MAVO pa scohe nan paquete di examen den 2e klas caba, un discusion cu awor ta keto, pero cu aparentemente ainda ta riba mesa. E tema pa cambia e sistema pa ningun mucha keda sinta mas den 1e y 2e klas, ta un discusion cu tambe ta andando, cu ta obvio cu e minister a lansa e idea, pero e no a pensa bon con pa ehecute.

E problema di infrastructura na nos scolnan ta birando cada biaha mas serio, y ta poniendo salud di nos muchanan y docentenan na peliger, sin conta cuanto danjo e ta ocasionando na e progreso di e muchanan den nan estudio. Ta increible cu awe ainda, drentando 2015, nos no tin un plan di mantencion di nos scolnan, pa garantisa e seguridad di nos muchanan y nos docentenan. Gobierno ta traha con cu ta, y ta ora un problema serio pasa, e ora ta core sera scol y busca solucion.

E falta di atencion na calidad di ensenjansa ta otro preocupacion grandi bou di hopi docente y mayornan, pero no tin placa y sigur ningun atencion di parti di gobierno pa atende cu e punto aki. Dia cu Union Europeo a manda 22 miyon florin pa nos inverti den ensenjansa, gobierno a gasta e placa aki na otro cos, y ensenjansa un biaha mas a wordo sacrifica.

Finalmente, e scol na Noord cu mester a bira un scol di MAVO/HAVO nunca mas a mira lus di dia. Gobierno a crea cantidad di cortina di huma, pero awor a wordo confirma pa AIB cu e scol aki a wordo sacrifica pa asina por paga pa e tram bin den caya Betico Croes. Mientras tanto no tin ningun clase di atencion mas pa e scol na Noord, algo cu nos di MEP ta lamenta masha hopi mes.
Nos lo sigi boga pa mas inversion den ensenjansa, pa mas atencion na seguridad di nos muchanan y docentenan, y pa e scol na Noord bira un realidad pronto, pasobra nos hobennan merece mihor”, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co