ORANJESTAD - Despues di a finalisa e proceso di Aruba su presupuesto 2014 y su version supletorio e tareanan pa cu e presupuesto 2015 ta continua. Minister di Finanzas, Angel Bermudez a haci un peticion na College Financieel Toezicht (Cft) pa nan asistencia, conseho y sosten pa e concepto di ley di e presupuesto 2015, locual recientemente a keda acorda entre Gobierno di Hulanda y Aruba.

Banda di e asistencia aki, e reforma di e aparato gubernamental, reforma di sistema fiscal y di e sistema presupuestal ta keda crucial di e maneho di Minister Bermudez pa e aña entrante. Pues e mandatario di finanzas ta contento cu pa e aña aki ya caba a keda aproba tanto e ley di fondo di pension como tambe e ley pa fondo di AZV cu tabata un aporte necesario pa e reformanan di su maneho.

A pesar cu ainda por reina algun incertidumbre den comunidad pa cu posibel medidanan den 2015, e mandatario ta consciente si cu e proximo aña lo ta uno cu lo trece retonan grandi pa Gobierno di Aruba tanto cu e reforma di sistema presupuestal como e conseho fiscal cu lo supervisa e proceso aki.

Minister Bermudez a expresa cu e lo continua cu e maneho financiero strinhente pa sigui reduci gastonan durante 2015 y añanan despues pa asina tambe logra yega na un presupuesto balansa pa 2018 y adelante. “Esaki sigur ta un condicion pa por cuminsa reduci e debe nacional y consecuentemente baha e gastonan di interes” e mandatario a indica.

Durante luna di December caba Minister di Finanzas conhuntamente cu Banco Central a ricibi e expertonan di Fondo Monetario Internacional (IMF) na Aruba pa asina inicia e prome fase di Conseho Fiscal cu algun tayer introductorio pa e diferente gremionan concerni. Pues e expectativa ta cu pa 2015 lo tin un idea mas conciso di e structura, organisacion y funcionamento di e entidad aki pa asina ancr’e den nos sistema legal y garantisa un miho supervision y monitoreo di e progreso di Aruba su presupuestonan.

Un di e retonan mas grandi tambe ta forma parti di e sistema fiscal cu ta trata di modernisacion y simplificacion di nos leynan di belasting. Prof. Dr. Vermeend kende ta e experto cu ta encabesa e proyecto aki pronto lo entrega na Minister Bermudez un rapport basa riba resultadonan di un ‘scan’ cu e comision a realisa algun siman atras mientras cu nan tabata na Aruba. E consehonan di comision Vermeend lo wordo entrega na Minister di Finanzas prome cu fin di e aña aki, pues e mandatario ta spera cu pronto lo tin un miho vision di con lo reduci e arsenal di nos leynan di belasting, adapta nan na reglanan internacional moderno y garantisa un pa ehecucion mas efectivo.

“Esaki ta conta tanto pa nos leynan di impuesto directo (loon-, inkomsten- y winstbelasting), como esunnan indirecto (BBO, invoerrechten y accijns). Esaki den combinacion cu mas digitalisacion, lo optimalisa e cumplimento cu nos leynan concerni. Tambe lo wordo considera introduccion di e asina yama ‘financial transfer levy’, cual mester garantisa e fondo di inversion cu entrada necesario”, e mandatario a splica. Hecho ta, cu banda di e reduccion di gastonan di gobierno, mester genera mas entrada pa asina por yega na un presupuesto balansa. E mandatario ta finalisa confirmando cu den 2015 mester bay cementa e reformanan esencial pa sigura un finanzas publico sostenibel pa futuro di Aruba.

Expresionnan haci den e articulo aki no necesariamente ta refleha opinion di ArenaPoliti.co