ORANJESTAD – E vision di Gobierno pa San Nicolas ta un plan cu ta materialisando y cada bes mas hende por mira resultadonan concreto. Minister di Asunto Economico, Comunicacion, Energia y Medio Ambiente, ing. Mike de Meza ta señala e hecho rotundo aki despues di a recore centro di San Nicolas recientemente den compania di Prome Minister Mike Eman. “E ta yena bo cu orguyo pa mira cu hendenan ta sumamente contento di wak tanto cos tuma luga. Nos a prepara nos mes y el a tuma tempo, pero awo e puzzel ta cay den otro,” Minister de Meza a comenta.

Adicional na tur e proyectonan cu ya caba Gabinete Mike Eman I y II a realisa den e districto di San Nicolas, tin stapnan cu ta tumando actualmente pa sigui hiba e area di pariba di brug dilanti. Scolnan, parkenan, facilidadnan deportivo y barionan a conoce renobacion y mehoracion; tin iniciativanan den tereno di servicio publico, turismo y economia ta cubri for di Pos Chikito te na Colony.

Na tur esey ta suma un 'Green Corridor' bou construccion cu ta haci e acceso na San Nicolas hopi mas facil y ta embeyece e bisindario di miles di ciudadano. Tambe tin e operador nobo pa e refineria, loke ta un motor grandi pa draai e economia y hunto cu e programa di incentivonan fiscal cu ya Gobierno a implementa y ta dunando resultado. Minister de Meza a confirma cu ya caba tin peticion di hopi comerciante local y internacional pa establece na San Nicolas.

“Pueblo ta compronde tambe cu no ta tur cos ta bin cla den un dia, pero a tuma su tempo. Awo e ta mas cristalisa y prueba cu tur loke nos a bisa no tabata djis promesa, pero nan por mishi cu e bloki, bo por mishi cu e hekinan bay y wak pa bo mes,” asina Minister de Meza a bisa para dilanti di 'Charm Jam Jerk House' den St. Maartenstraat, Village unda tanto Minister de Meza como Eman a bishita durante un recorido den centro di ciudad.

Expresionnan haci den e articulo aki no necesariamente ta refleha opinion di ArenaPoliti.co