"Awe nos ta para akinan como un generacion nobo di yiunan di nos islanan cu mas di 60 aña pasa a inicia cu un lucha pa un dia nos ta 'Baas den nos mes Cas'," tabata e introduccion di un discurso sumamente elocuente di Prome Minister di Aruba, riba e dia cu ta conmemora 60 aña di Statuut di Reino Hulandes. Riba 15 di december di aña 1954, Reina Juliana a firma e Statuut den Ridderzaal na Hulanda.

E celebracion, presencia pa tur tres Prome Minister di e parti di Reino Hulandes Caribense hunto cu un cantidad grandi di dignatarionan di Reino Hulandes a tuma luga dilanti di e conocido 'Monumento di Autonomia' na Corsou. E monumento tin e texto conoci, ‘Steunend op eigen kracht, doch met de wil elkander bij te staan’. Simbolicamente e monumento ta representa e 6 islanan di ex-Antiyas Hulandes, cu 6 pahra bulando den diferente direccion y na e mesun momento nan ta den union cu e mesun meta na bienestar di e pueblonan.

Prome Minister Eman su discurso a describi firmamento di Statuut di Reino como un momento crucial y a bisa di ta sinti un orguyo grandi pa e lidernan cu a dirigi nos pais nan na e momentonan ey. Prome Minister di Aruba: "Dr. da Costa-Gomez na Corsou, Henny Eman na Aruba, hombernan humilde cu a nace mey mey di secura, bou di situacionnan sumamente dificil, a mira colonisacion, a sinti e dolor di opresion, a biba racismo y a sinti e division cu tanto aña di sacrificio, esclavitud a pone riba nos pueblonan." Siguiendo el a splica con den nos region, e tempo ey, otro islanan a pidi pa independencia basa riba loke emocionalmente nan tabata desea. Eman a enfatisa, "pero den nos pais nos tabata tin lidernan cu a sinti e dolornan aki, cu a sinti e pasionnan aki, pa un dia nos ta 'Baas den nos mes Cas'," pero na e mesun momento, Sr. Eman ta splica cu e lidernan aki, "tabata tin e grandeza pa supera e dolornan aki. Nan tabata tin e inteligencia con pa pone e fundamentonan pa islanan chikito por sigui perdura den temponan di retonan grandi den un mundo yen di incertidumbre."

Prome Minister Eman ta referi aki na e balansa cu mester tin entre emocion y racionalismo den oranan cu ta tuma desicionnan di indole grandi asina. "Ta esey ta e herencia cu nos a haya, di lucha pa e defensa y dignidad di nos pueblonan y na e mesun momento pa busca e lazonan di coperacion cu ta haci posibel entre nos islanan, nos paisnan y cu nos madre patria, pa nos crea un forma di coperacion den cua cada pais y cada pueblo su futuro lo ta sigura."

Prome Minister Eman a sigui bisando, hopi convenci cu: “Awe cu nos ta reflecciona riba e 60 aña di Statuut, lag'e ta un inspiracion tambe pa e dirigentenan na e otro banda di lama, cu ta forma parti di nos Reino Hulandes pa mira con e lidernan di nos islanan cu tur e momentonan di dolor, e sintimentonan asina evidente cu a marca nan bida, a supera esakinan, pa construi e puentenan pa un mihor futuro pa nos Paisnan.” Sr. Eman kier pa e inspiracion di busca e cooperacion entre nos Paisnan tambe sigui den un refleccion di respet y dignidad cu tin di duna cada pueblo pa e forma con nan tin di percura pa un miho futuro den cada un di e Paisnan y su pueblonan.

Finalizando di su discurso, Sr. Eman a expresa gratitud pa e palabranan di sosten y consehonan huicioso cu a transende fronteranan pa yega pueblo di Aruba den momentonan dificil. Prome Minister Mike Eman ta referi aki na entre otro palabranan di sosten di ex-Prome Ministernan Sra. Maria Liberia-Peters, Sra. Mirna Godett, Sra. Suzy Römer, Sr. Don Martina, Sra. Emily de Jongh-Elhage y Sr. Etienne Ys. Despues di a gradici Prome Minister actual di Corsou, Sr. Ivar Aasjes pa e invitacion pa conmemora e fecha importante aki hunto cu nan, el a finaliza su discurso cu e siguiente frase: "Ban sigui construi e Reino Hulandes den cual dignidad di nos pueblonan ta keda respeta y hunto nos ta inverti den tur locual ta haci nos mas fuerte den un coperacion strategico."

Expresionnan haci den e articulo aki no necesariamente ta refleha opinion di ArenaPoliti.co