Na momento cu Gabinete Eman a yega na mando na 2009 nan a haci tur lo posibel pa boycotia e proyecto di reduci sushi na e dump di Parkietenbos. Nan a logra pa saca e plug afor y para e planta di procesa sushi cu e compania Bouldin & Lawson a traha cu un costo di 28 miyon na inversion di placa di Pueblo. Na su lugar Gabinete Eman no a bin cu ningun otro proyecto pa procesa, reduci of recycla sushi na nos Pais. Consecuencia di esaki ta cu pa 7 aña largo e seronan di sushi na e dump a crece y cune a trece mas molester y problema di salud pa esnan biba den cercania, sushi ta bay den nos lama y nos medio ambiente na Aruba a keda malamente afecta. E capricho di e Gobierno aki a trece caos cune cu ta afecta salud y bienestar di nos Pais y pa e crimen aki Minister Sevinger mester wordo teni responsabel. 

Proyecto boycotea 
Den e sentencia di Huez di 10 februari 2016 a confirma cu e proyecto di Bouldin & Lawson a wordo boycotea pa Gabinete Eman en especial door di Minister Sevinger como e minister encarga. Den e sentencia por lesa cu e planta no por a funciona debidamente ya cu Gobierno no a facilita diesel pa e machinenan. Gobierno no a percura pa spare parts y otro material necesario. No lubida cu durante un inspeccion cu Parlamento a haci na e facilidad na dump, nos tabata testigo cu ni un basora drechi e trahadornan tabata tin pa por a bari y tene e facilidad limpi. Banda di esaki Gobierno no a percura pa tin suficiente trahador pa atende e machinenan optimalmente. Y mas cu claro esnan liga na e Gobierno di AVP a percura pa tira sushi cu no ta sushi di cas den e machinenan pa asina por logra kibra e djientenan di e machine pa despues Minister Sevinger por a bin zwaai cu kotex den Parlamento bisando cu e djientenan ta kibra y e machinenan no por ni procesa kotex. Un berguensa cu ta tipifica e manera baho cu Minister Sevinger a trata cu un proyecto asina importante pa nos Pais. 

Minister Sevinger ta responsabel 
Door di deliberadamente boycotea e proyecto pa reduci sushi na dump, awe tin persona biba den cercania di e dump cu tin problema cu salud. Tambe sushi ta cay den lama y ta causa contaminacion. Pa no papia mes di e caos na dump ora cu e sushi ta pega na candela y ta afecta salud y bienestar di nos Pais. Y sin conta e gastonan extra cu Pueblo mester paga pa tur e casonan dilanti Huez cu a surgi door di e boycot aki. Na nos opinion, Minister Sevinger mester wordo poni personalmente responsabel pa tur e caos y gastonan aki. Pueblo a confie cu e cartera di medio ambiente, pero pa capricho politico e mandatario a comete erornan cu awe ta afecta e salud y bienestar di nos Pais. Minister Sevinger no por djies keda liber di e crimen cu ela haci contra medio ambiente y nos Pueblo.

8 juli 2016

Expresionnan haci den e articulo aki no necesariamente ta refleha opinion di ArenaPoliti.co