Tin diferente aspecto cu mester wordo aproba den Parlamento, por ehemplo pa Gobierno incorpora e compañía ‘’Aruba Refinery’’, cual den e caso aki ta un NV.

Tambe pa e release di Valero pa loke ta trata cierto claim, tambe mester di aprobación di Parlamento. Esaki ta bira un tipo di settlement agreement, y pa aprobación di contratonan cu a of lo wordo firma, cu entidadnan nobo di Citgo lo mester di aprobación di Parlamento según e competence verordening.

Asina Andin Bikker a splica den rueda di prensa semanal diamars. E parlamdentario a bisa cu e no sa si esaki a bay of ta bayendo Raad van Advies pa conseho, y después di esaki lo bin Parlamento, of si gobierno mes duna su rapport pa nan bay Parlamento pa trata nan.

Como cu tin un dead line cu ta 1 di Augustus, tin expectativa cu esakinan lo wordo trata, dentro di corto tempo y en todo caso den Parlamento, caminda cu informalmente nan tin un entendimento cu esaki ta di interés nacional y e fraccionnan lo ta disponible pa durante recess por wordo yama back pa trata e  leynan aki, pasobra sigur ta beneficioso pa pueblo, y en todo caso, PDR ta keda disponible pa durante recess por bin back pa trata e leynan aki.

Parlamentario Bikker a bisa, tocante e responsabilidad di Valero pa loke ta trata medio ambiente, of dañonan causa pa e refinería, cu pa haci un rapport di esaki pa negocia riba dje, lo dura dos aña pa sa exactamente kico nan ta, pa tin indicadornan cu por negocia.

Valero kier a bay haci destahonan publico pa sa cuanto lo ta e neto balor pa entrega e tereno desmantela. Dus si mañan gobierno bisa cu aki 15 aña después cu Citgo opera e refinería nan lo prolonga e contrato pa 10 aña mas, e ora ey cu gobierno bay básicamente na clean up,  e exposure eynan ta costa 30 miyon dollar mientras cu aworaki ta 60 miyon cu den e contrato nobo ta fifty fifty.

Pero eynan nos tin e traspaso di petróleo cu ta bal como 60 miyon dollar, tin e terenonan cu tin tur e improvements cu Citgo ta bay haci, pasobra PDR tin entendí cu den e contratonan ta bisa cu tur e mehoracionnan ta di minimo 8 miyon dollar cu Citgo ta bay inverti den dje, pero ora nan devolve e refineria e ta keda pa gobierno di Aruba.

Neto neto tur esey ta pa cu e reapertura di nos refinería, cu ta mucho mas fructífero pa país Aruba cu si a bay over pa e desmantelacion y esey tabata e argumento di PDR pa añanan largo,  y tin biaha partido AVP ta critica y chercha nos, pero nos no ta worry pa wanta esaki, basta cu na interés di país Aruba nos a bringa pa loke ta mihor pa país Aruba. ‘’Den nos concepto y nos ta hayando razón tur dia, e reapertura di e refinería ta e mihor bao e circumstancianan cu tin awor, pa país Aruba, y e hecho cu a logra adicionalmente cu a logra pa opera gas natural, ta haci e decisión mucho mas fácil pa cu e reapertura akinan, pasobra ambientalmente ta bay ta full otro setting mucho mas positivo pa nos medio ambiente, pa cu e operación di e refinería, akinan” Andin Bikker a bisa.

Expresionnan haci den e articulo aki no necesariamente ta refleha opinion di ArenaPoliti.co