E actual gobierno na mando no por saca su som despues di e supuesto bon trabao di 2009-2013. Un gobierno cu a kibra tur decencia di bon gobernacion cu a haci y deshaci na nan antoho pasobra segun partido AVP ta nan tin e poder: “Nos tin 13 asiento y pueblo a duna nos e poder absoluto pa destrui Aruba”. Un gobierno cu a haña 2.7 biyon florin extra na entrada anto awe na 2016 di cada florin 82 cent ta bay pa paga debe. Un gobierno sin cuero di cara y sin etica y mucho menos escrupulo. na un manera neoliberal a hiba gobernacion pa e ultimo 7 añanan. Ainda nan ta papia di e Papa/Tanchi di líder di MEP pa tapa nan mal maneho hiba. Gobernantenan cu no tin e decencia di admiti cu nan a haci un desaster cu nan decisionnan ehecutivo.

Locual pais Aruba tawata tin na debe den 23 aña, e gobierno di AVP a redobla esaki den apenas un periodo di gobernacion. E mas tristo ta cu nan no ta stop pero ta sigui endeuda nos yiunan y nan yiunan. Tin miyones pa 20 cas "loco" pero pa pueblo no tin progreso social economico. No tin placa pa yuda nos famia hobennan realisa nan soño. Un cas, un auto, un famia cu entrada husto pa sobrevivi of mihor bisa pa ta sostenibel na un manera responsabel. Mike y su gobierno ta contra Status Aparte, nan a entrega e curason di esaki, nan ta contra nos himno y bandera a bay cambia esaki na New York, contra nos referendum, nan ta prefera lembe y firma protocolnan contra nos Autodeterminacion. Nan ta contra nos ortografía etimologico pasobra no ta promove e sentimento patriotico den nos enseñansa. Nan ta contra reapertura di nos refineria, e unico proyecto den 7 aña cu lo atrae FOREIGN DIRECT INVESTMENT (FDI) pa crece nos economia. No ta AVP a logra esaki pero nan ta apenas e instituto gubernamental cu tin cu percura pa esaki.

Rond di Aruba den tur bario y districto tin problemanan social hopi alarmente sin e debido atencion. Nos tin adictonan ambulante creciente, atraco cu arma di candela creciente, droga y ilegalnan drentando nos pais semanalmente cu un gobierno narco complaciente. Prostitucion cayehero a lanta y bayendo den aumento cu tur e consecuencianan cu esaki lo trece cun’e. Cantidad di taxi pirata riba caya ta sigui crece y ta parce cu nos isla a perde tur su sentido di civilisacion moderno. Casonan criminal grandi den e ultimo añanan sin solucion riba un pais asina chikito. Nos turistanan birando victima di atraco. E cruceronan no kier bin Aruba mas anto asina mes esunnan cu ta hospeda na nos hotelnan ta wordo abusa ora nan bay den nos capital cu e parkeermeters di Minister "Mi ta Retira 1 Maart" Oduber. Awo mas cu nunca pueblo mester uni pa cambia e rumbo destructivo aki prome cu nos bira un pais unda no tin respet pa ley y tur hende ta haci locual nan kier. E maneho neoliberal di Mike a pone cu nos ta na e entrada di un Explosion Social sumamente grandi.

Expresionnan haci den e articulo aki no necesariamente ta refleha opinion di ArenaPoliti.co