Nos pais ta den un un gara y ola di criminalidad hamas antes bisto. Pa e promer 9 lunanan di anja a registra nada mas y nada menos cu 50 atraco. E anja aki ta anja record pa loke ta trata atraco. Nunca antes den historia di nos pais a registra 50 atraco den un anja y mester corda cu ainda ‘’High Season’’ no a cuminsa manera minister Dowers ta yame. Ta remarcabel cu net e partido cu a ofrece solucionan y plan pa combati criminalidad awe NO por maneha nos pais y a percura pa e situacion bai for di man. Tin un situacion caminda minister Dowers ta bisa cu e mester mas placa pa combati criminalidad y segun e mandatario e tin mester minimal 10 miyon florin. Di otro banda bo tin e otro minister presidente di Aruba Otmar Oduber ta bisa cu e no por duna 10 miyon florin sino por yuda cu 4 miyon florin. E cosnan aki ta inacceptabel pasobra tur hende ta sinti nan mes insigur riba e pais aki y tin un rancamento di ciboyo si Otmar Oduber ta keda cu e placa of no. No por ta asina cu criminalidad ta azotando nos pais y tin problema cu placa pa combati criminalidad. Ta cuestion di prioridad y ta pesey nos pais ta den e problemanan aki. E culpabel y responsabel pa e situacion aki ta promer minister Mike Eman cu no por fiha prioridad di gobernacion. No tin placa pa traha scolnan, no tin placa pa ensejanza, no tin placa pa combati pobreza, no tin placa pa combati criminalidad y tin 700 miyon florin pa Green Corridor y Watty Vos Boulevard. Ta incompredibel cu e escusa ta cu no tin placa pasobra manera e gobierno aki ta fiesta cu placa di pueblo e excusa ey no ta valido.

A yega e momento aki pa nos tur riba e pais aki demostra union y marcha pa un causa husto. Nos no por sigui biba den trankilidad cu nos ta bibando. Criminalidad no ta haci distincion di color politico, rasa, religion of nacionalidad! E ta algo cu ta touch nos tur y ora bo combersa cu esnan cu a wordo horta of atraca nan por contabo den ki trauma nan ta keda aden. Nos mester uni y mustra gobierno cu criminalidad tin henter nos pueblo preocupa y cu nan mester tuma accionnan awor pa frena esaki. Nos kier biba trankil, nos no kier biba sera, nos kier yega cas trankil sin mester bira wak atras. Awor aki ningun hende ta sinti e trankilidad aki y ta pesey dia 29 september 2016 nos ta pidi union di henter e pais aki.

Expresionnan haci den e articulo aki no necesariamente ta refleha opinion di ArenaPoliti.co