Nunca nos a perde fe y speransa den reapertura. 

Sra Evelyn Wever-Croes, riba e reapertura di e refineria, ta bisa cu den e dianan aki, tur tempo y energia ta bay na e contractonan relaciona cu e reapertura di e refineria, esta contractonan di CITGO y di Valero.

“E punto di salida di Partido MEP ta e conseho di Raad van Advies, kende contrario cu Parlamento, si a haya tur documento. Nan a haci un analisis hopi extenso di e situacion y di e contractonan y den un conseho di 11 pagina ta duna Parlamento e guia cu nos tin mester pa nos haci nos trabou”, sra Wever-Croes ta bisa.

Lider di MEP ta enfatisa cu e tin un respet enorme pa e instituto di Raad van Advies como tambe un aprecio grandi pa e trabou inmenso cu nan a haci den e caso aki cu ta pone cu apesar di no a haya tur documento for di Gobierno, nan lo bay enfoca riba e puntonan di conseho di Raad van Advies.

“Mi tin pa bisa si cu Partido MEP nunca a perde fe y speransa cu nos ta bay logra diversifica nos economia atraves di nos industria petrolero”.

Sra Evelyn Wever-Croes ta expresa loke ta deseo y vision di Partido MEP pa un refineria na Aruba. Naturalmente tin e deseo di mira cu un refineria ta wordo habri y no un ‘upgrader’ manera awor aki ta e caso.
Naturalmento e desea ta pa mira cu awor hopi mas mama y tata ta bay haya trabou y pago husto, cual tampoco ta e caso awor aki.
Naturalmente tambe, tin e deseo di bay mira un refineria cu lo bay opera segun standardnan internacional di medio ambiente como tambe standardnan internacional di salud di hende cual tampoco ta e caso awor aki.

“Pero esey nan tur ta parti di visionnan di partido MEP riba terminonan largo y loke cu Gobierno ta brinda nos awor aki sikiera ta e prome paso den e direccion ey”, Lider di MEP ta bisa.

Sra Evelyn Wever-Croes ta termina bisando: “Partido MEP nunca a perde e speranza den e reapertura di e refineria. Aunke cu e Gobierno aki ya caba tabata cla pa desmantela. Ya nan a parti e bolo caba di desmantelacion. Dus pa awor nan bin cu e prome paso aki cual ta un upgrader, mester bisa cu ya esaki ta un paso grandi y Partido MEP tin un sentimento di hopi satisfaccion cu esaki”.

Expresionnan haci den e articulo aki no necesariamente ta refleha opinion di ArenaPoliti.co