Den e luna cu a pasa por a tuma nota di un relato di Banco Central (“Charts & Trends”) di diferente grafico conteniendo resultado di entre otro Turismo cu ta parti di e sector real (real sector). E graficonan ta ilustra resultadonan di 2016, te unda cu esaki ta disponibel, compara cu 2015 y 2014. Un di e prome graficonan ta naturalmente e bishitantenan Stayover y di cual por nota claramente cu esaki a experencia crecemento significante den 2015 compara cu 2014, pero lamentabelmente e tendencia aki no a mantene su mes te 2016 y Aruba a sufri caida desde april te cu e augustus 2016 manera ilustra den e grafico. Señal cu grandemente e indicador aki tawata tin su efecto door di e mercado Venezolano cual e ex mandatario di Turismo a nenga di divulga of admiti su efecto den su afan di show off.

Otro indicadornan den e industria di Turismo den e sector real cu no tawata refleha mes positivo durante e añanan anterior manera ta e caso di bishitante Stayover, ta e cantidad di pasaheronan Crucero, Ocupacion di hotel, Revpar (revenue per available room) di hotel y un otro indicador basta importante, esta e placa cu bishitantenan ta laga atras den economia di Aruba, “Tourism Receipts”. Tur e indicadornan aki tambe ta ilustra den e graficonan adhunto y por tuma nota di nan tendencianan tambe pa 2014, 2015 y te unda cu esaki ta disponibel pa aña 2016.

Pa Revpar di hotelnan por nota cu no por constata un tendencia mucho diferente pa 2015 y 2016 compara cu aña 2014 y sigur no na e nivel di fluctuacion di bishitante Stayover durante e mesun añanan aki. Pa cu e Occupancy rate di hotelnan desde 2014 te cu awor hasta por bisa cu e sector aki a sufri caidanan drastico desde 2015 caba y te ainda no tin un tendencia satisfactorio mirando e cantidad di bishitantenan cu ta keda den “Other Accommodation”, specialmente e mercado Venezolano. Casi mesun cos por wordo bisa di pasaheronan di Crucero, cu excepcion di luna di maart di 2016, tampoco por nota señal di crecemento manera tawata e caso di bishitante Stayover, ni pa 2015 y tampoco pa 2016.

E indicador “Tourism Receipts” real tambe ta wordo presenta door di CBA y su tendencia tambe ta wordo refleha pa e lunanan di aña y por tuma nota atrobe cu e indicador monetario aki tampoco ta registra mucho tendencia di crecemento y sigur no pa aña 2016!

Na aña 2008 y 2009 tawata tin US$14.6 miyon y US$25.2 miyon respectivamente disponibel pa mercadeo di Aruba como destinacion Turistico y a scucha declaracion di Minister di Turismo anterior unda e mes a declara cu aña 2016 lo bay cera cu un total di 100.0 miyon florin pa ATA (bank) y tambe por bisa cu esaki tawata 94.6 miyon florin na 2015 y 88.2 miyon florin na 2014.

Pues tumando nota di tur e indicadornan di Turismo aki por bisa cu e Minister di Turismo anterior tawata gaba y conta su banda di storia di con bon den su bista Turismo ta bayendo siendo cu tur tempo tin indicacion cu e tawata abstene di papia di e situacion real. Esaki casi sigur paso e no por acepta cu e no por a maneha e cartera aki. Mas pio ainda, si analisa e desaroyo total di e industria di Turismo y alabes pone esaki contra e placa cu e Minister di Turismo anterior tawata tin na su disposicion pa entre otro mercadeo di Turismo, sigur no por comprende dicon e por a biba cu e resultadonan aki y su mes!

Expresionnan haci den e articulo aki no necesariamente ta refleha opinion di ArenaPoliti.co