E batuta di mentira a ser pasa di Rene pa Chris: 

Despues cu AVP por medio di Rene Herde no por a sigui defende e maneho financiero desastroso cu a ser hiba durante e ultimo 7 añanan, awor nan ta manda un otro parlamentario, esta Chris Dammers pa wak si e si por logra di sigui manipula y venena mente di pueblo cu mentiranan flagrante riba MEP. Durante e ultimo simannan aki Chris Dammers, kende no tin e capacidad pa bira minister a tuma como fishi pa pinta e periodo di 2001-2009 como un periodo scur caminda MEP supuestamente a hiba un maneho descabeya sin rumbo y sin vision. Sinembargo tur cifra y dato estadistico ta mustra cu hamas den historia di nos pais nos a conoce un economia asina floreciente manera cu tabata e caso durante Gabinete Oduber, anto esaki sin hinca nos pais den debenan biyonario y innecesario manera Chris Dammers su gobierno si a haci.

1. Na final di 2001 nos di MEP a haya un pais na rand di bancarota cu debenan astronomico cometi pa gobierno di AVP. E debenan aki a suma na mas di 800 miyon florin y e debenan tabata di e Garantianan di Mafia Italiano, e proyectonan corupto di Race Track, Radar, Fondo Desaroyo San Nicolas, Radisson, Winston & Strawn etc. Hecho ta cu den un forma diligente Gabinete Oduber a percura pa paga tur e debenan aki cometi pa AVP y te hasta a negocia cu Sace di Italia pa reduci e debe di garantianan cu 100 miyon dollar. Fuera di esey Gabinete Oduber den e periodo aki a ser confronta cu e efectonan negativo di e desaster di 9/11, e guera di Irak, e epidemia di Sars y e caso di Nathalee Holloway.
   
   
2. Na 2001 Gabinete Oduber a hereda un turismo na werki for di gobierno di AVP caminda a registra un caida drastico di 721 mil turista na 2000 te 691 mil na 2001. Sinembargo Gabinete Oduber no a sinta yora pero a traha duro durante 8 aña y a logra crece nos turismo y esaki a yega te na 810 mil turista na 2009. Alavez nos a percura pa aumenta e turismo crucero for di 487 mil na 2001 te na 607 mil na 2009.
   
   
3. Gabinete Oduber a percura pa aumenta nos GDP for di 3437 miyon na 2001 te 4473 miyon florin na 2009 y te hasta a logra kibra un record na 2008: 4914 miyon florin. Hecho ta cu tur e buya y payasadanan di AVP, te ainda despues di 7 aña nan no a logra kibra e record aki!
   
   
4. Na 2001 Gabinete Oduber a hereda un crecemento economico negativo di -3.0%. Sinembargo for di 2003 te cu 2008 nos pais a conoce solamente crecementonan economico positivo (2003: 2%, 2004: 7.9%, 2005: 1.2%, 2006: 1.1%, 2007: 2%, 2008: 0.2%). Cu na 2009 tabata tin un caida den nos economia cu -11.3%, esey ta debi exclusivamente na e crisis financiero mundial cu a afecta nos pais tambe severamente. Den henter mundo ta Chris Dammers so no ta consciente di esaki.
   
   
5. Durante e 8 añanan di Gabinete Oduber nos pais a conoce na dos ocasion Surplus den presupuesto, esta na aña 2003: 172.4 miyon florin y na 2008: 51.4 miyon florin.
   
   
6. Si na 2001 Gabinete Oduber a hereda e reserva di divisa na 660 miyon florin, den 8 aña di tempo a logra aumenta esaki drasticamente te na 1475 miyon florin na 2009.
   
   
7. Si na 2001 Gabinete Oduber a hereda e salario minimo na 1112 florin pa luna, den apenas 8 aña esaki a aumenta te na 1678 florin pa luna.

Tur e desaroyonan positivo aki a conduci cu for di 2005 en adelante Gabinete Oduber a haya elogio so for di instancianan internacional manera IMF, Fitch, Standard & Poor’s, caminda na 2009 pais Aruba tabata goza di un Credit Rating di A- y un Outlook Rating Stable. Te hasta Gobierno Hulandes por medio di Secretario di Estado Ank Bijleveld publicamente a duna elogio (lof) na Gabinete Oduber pa e maneho cu a ser hiba riba finansa publico. Awendia bao di Gabinete Eman nos no a conoce ningun  elogio for di Madre Patria, pero solamente Aanwijzing, KB y CAFT, caminda nos autonomia financiero a ser traiciona pa e gobierno cu Chris Dammers ta sostene ciegamente. Den e proximo articulo MEP lo elabora mas riba e desaster financiero di e ultimo 7 añanan di Gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co