MEP: Na kico Gabinete Eman a gasta e 2.7 biyon florin extra cu nan a ricibi desde 2009?
Rene Herde mester splica pueblo di e bagamunderia aki
Awor cu nos ta na vispera di un aña nobo, un biaha nos mester constata con e ex-lider di fraccion di AVP, Rene Herde kier sigui venena mente di pueblo declarando un cantidad di disparate contra partido MEP. Su mentiranan constante a resalta e biaha aki atrobe, entre otro su declaracion cu “na 2009, despues di a goberna nos pais pa 8 aña largo y sin un crisis of desaster natural, MEP a laga nos pais den decadencia”. Aki nos por mira un biaha mas cu Rene Herde ta asina ignorante cu e no kier reconoce y admiti cu durante 2008/2009, esta durante Gabinete Oduber nos pais a sufri y a ser afecta gravemente debi na e crisis financiero internacional. Sinembargo, asina mes cu un crisis internacional devastador den su contra, Gabinete Oduber a logra hiba un maneho financiero responsabel y cu a haya elogio di tur instancia internacional manera Fitch cu a duna pais Aruba na 2008 un IDR di BBB, un Country Ceiling A- y un Rating Outlook Stable. Y Standard & Poor’s na 2009 tambe a duna pais Aruba un Credit Rating di A-, un Rating Outlook Stable y un ‘prosperous economy’. Awor esaki ta e decadencia cu Rene Herde den su ignorancia ta papia di dje?
AVP a downgrade pais Aruba
Tambe Rene Herde ta un di esnan cu semper ta come y lubida ya cu MEP na 2009 a laga atras 970 miyon florin den caha di gobierno, esta di e Placa di Plant Hotel, BBO riba export di Valero, FDA etc. y cual suma e gobierno di AVP a derocha na nan antoho na e cantidad di viahenan rond mundo, coordinadornan incapacita ganando un promedio di 9000 florin pa luna, huurnan di compinchinan politico, oficinanan di abogado y tur e locuranan di green. Hecho ta cu na lugar di skirbi tanto disparate asina, Rene Herde na ceramento di e aña aki por a splica pueblo na kico su gobierno abusado a distribi e suma di 970 miyon aki. Y de paso e lo por duna un splicacion tambe na kico su gobierno a gasta e suma di 1.7 biyon florin extra na debe cu nan a crea den 6 aña di tempo. Pues den total 2.7 biyon florin extra cu nan a ricibi, pero cu te ainda nan no por responsabiliza esaki na pueblo! Splica pueblo tambe dicon pais Aruba bao di Gabinete Eman a ser downgraded te na un rating di BBB- y cual rating ta un paso so mas pa cay den e categoria di Junk rating?
Medidanan cruel
Tambe ora cu Rene Herde ta papia di medidanan cu MEP supuestamente lo a tuma durante su gobernacion y cu AVP nunca a tuma medida, mester recorda con AVP a coba den cartera di tur hende biba na Aruba y te hasta di turistanan durante e ultimo 7 añanan: Aumento di prima di AZV cu 2%, BAZV cu 2%, AOV cu 2%, aumento di edad di pensioen te 65 aña, franchise, middelloonregeling, reduccion di duurtetoeslag, aumento di grondbelasting, eliminacion di inflatiecorrectie, aumento tarifa di bus, aumento tarifa di coriente cu 15%, aumento di schoolgeld y collegegeld, pago pa recoge sushi, pago pa parkeer, aumento di room tax, time share tax, vliegtax, car rental tax, reduccion y eliminacion di subsidio na SABA, SKOA, SVGA, FDEC, Casa Cuna etc.
Pues asina henter pueblo mes por mira con e gobierno di AVP a goberna nos pais durante e ultimo 7 añanan cual no ta ningun arte ya cu e cantidad di medidanan cu nan a impone riba lomba di pueblo ta papia pa nan mes. Nos grandinan, nos studiantenan, nos ambtenaarnan, nos trahadornan den sector priva, nos muchanan special, nos adictonan etc., nan tur a sufri di e zwiep cu Gabinete Eman a pasa nan y ta premira cu nan lo sigui pasa nan e zwiep aki den e aña venidero.
Expresionnan haci den e articulo aki no necesariamente ta refleha opinion di ArenaPoliti.co