TA NENGA DI PONE ORDEN ORA EVELYN TA NA PALABRA   

ORANJESTAD -- Den Parlamento e presidente actual Mervin Wyatt-Ras no por a sconde su rabia riba partido MEP y especialmente su lider Evelyn Wever-Croes. Parlamento a trata 5 ley riba un solo dia. Remarcable tabata cu masha poco parlamentario di AVP a hiba palabra pa tur e leynan ey, sinembargo nan tur tabata grita mahos y tira palabra den sala constantemente.

Especialmente na momento cu lider di MEP tabata na palabra e Parlamentarionan di AVP tabata hasi masha desordo. Nan tabata tira palabra, ofende e lider di MEP na formanan masha baho mes. Nan a insulta su mama y su tata manera custumber, pero tambe tabata grita hopi bulgaridad. Especialmente Marlon Sneek, Melvin Tromp y Clariska Velasquez.

Pero mas tristo ta cu e presidente di parlamento no a hasi nada pa pone orden ora sra. Evelyn Wever-Croes tabata na palabra. Esnan cu a purba sigi e reunion tabata tin problema pa scucha locual lider di MEP tabata bisa, debi na tanto gritamento di parlamentarionan di AVP. Mientras tanto e presidente di Parlamento tabata hari y hunga riba su telefon. Lider di MEP a hala su atencion varios biaha, pero Mervin Wyatt-Ras a sigi hari, hunga riba su telefon y ignora e lider di MEP. Te ora lider di MEP a bise cu e mester stop di hunga riba su telefon, e ora Mervin Wyatt-Ras kier a rabia y bisa cu e lider di MEP ta falta respet p'e. Increible! Mervin Wyatt-Ras a demostra cu su rabia riba MEP y especialmente su lider ta ciegu'e di tal forma cu e ta lubida cu e ta un presidente pa HENTER e parlamento.

Mervin Wyatt-Ras a demostra claramente cu el'a faya y no por tene orden den Parlamento.

Expresionnan haci den e articulo aki no necesariamente ta refleha opinion di ArenaPoliti.co