Pueblo di Aruba, den prome instante e noticia cu coriente ta bay baha cu 15% ta zona alentador. Pero, en realidad esaki ta completamente otro. Na prome lugar, e promocion aki ta uno politico oportunista y di gran humiyacion. Dicon? Pasobra esaki ta bin na vigor despues di tres aña di castigo di cobranza, sin misericordia, di coriente mas halto cu 15%. Simplemente pa motibo di HEDGING descabeya na WEB NV. Anto esaki cu bendicion di minister De Meza tambe. Consecuentemente, e gobierno di AVP a castiga, abusa y maltrata e pueblo cu un prijs haltisimo di coriente. Esaki ta haci mi corda tempo cu Michael Jackson a paga 10 miyon na e mucha/victima cu supuestamente el a abusa sexualmente di dje. Djis paga pa kita su pica. E echo condenabel mes ta keda graba den bida di e mucha. Asina AVP a haci cu hedging na WEB NV. Pa colmo, dia parti di e pueblo a lanta pa reclama, gobierno di AVP a manda riot comando pa bati, suta y malogra esnan cu a protesta. Of nos a lubida caba? Pesey mes PM Eman a bisa ex-presidente di parlamento den su orea: “vota voor, e pueblo ta lubida liher”. Pues, PM Eman ta mira e pueblo di Aruba pa un pueblo di hende kens?

Na di dos lugar, bo mester puntra bo mes dicon awor numa PM Eman ta baha e prijs di coriente? Esaki ta solamente pa motibo di e aña electoral. Ken no sa cu na 2017 ta bay tin eleccion gubernamental na Aruba? Asina e colebra, e víbora y e dragon berde ta manda su veneno den curpa di e pueblo di Aruba. Promoviendo su trabow siendo cu ya caba el a mata bo como pueblo. PM Eman a splica cu gobierno a scoge pa reduci e tarifanan di energia enbes di tuma dividendo di e companianan aki. Esaki ta otro mentira y trocemento di e berdad. Door di a cobra pueblo e coriente hopi caro pa tres aña, ta hopi dividendo ta bai tin na 2018. Awor bo sa unda bo placa a bay. Pueblo di Aruba, ban ta mas spierto y consciente relaciona cu PM Eman su intencionnan macabro di tuma bo haci sokete anto den dia cla. Corda cu ta e pueblo so por salba su mes for di e gara y esclavitud berde. Pues AVP nunca mas te den siglo di siglonan.

Expresionnan haci den e articulo aki no necesariamente ta refleha opinion di ArenaPoliti.co