Otmar Oduber (POR): Den prome aña di gobernacion lo para tur actividad di candela na Parkietenbos
![Otmar06](/cache/klixowatermark/d39f8d4696b8d7eac3b6194d2ff9f2cc.jpg)
Esaki ta conta tambe pa tur otro dump ilegal riba nos isla.
Atrobe scolnan mester a cera porta, e biaha aki na Paradera pa motibo di dump ilegal na candela. Esaki ta fungi como recordatorio riba e compromiso cu nos plataforma POR a haci. Una bes cu nos drenta gobierno nos lo percura pa durante e prome 6 lunanan decision tuma luga y den e prome aña accionnan tuma luga pa para tur actividad di candela riba dump Parkietenbos y tur rond di Aruba y cu solucion structural ta wordo implementa/ehecuta.
Otmar Oduber di POR ta bisa cu no tin nada di studia mas. No tin rapportnan cu mester wordo traha mas pasobra tin suficiente rapport cu a wordo traha durante añanan. Tin demasiado expertonan cu a mustra caba riba e hecho di e malo cu esaki ta ocasionando na tur e besindario directamente den e cercania di e dump na Parkietenbos. Pero sigur tambe na otro areanan manera ta e caso na Paradera cu un biaha mas a wordo afecta di tal forma cu hasta personnan a haya ‘rash’ di e shinishi. Brandweer a cera sigur dos scol pa motibo cu e ta malo pa salud di e hendenan. “E dolor cu nos ta sinti pa e candela ey ta e dolor cu nos ta sinti pa e besindario di Parkietenbos cu ta bibando den e situacion aki pa añanan largo caba. Nos ta convenci cu companianan local por ta e solucion hunto cu nos propio departamentonan di gobierno cu mester por traha a base di e diferente rapportnan existente.” Un solucion mester wordo crea, sr. Oduber ta enfatisa.
Si tin placa pa paga 300 miyon pa un Avenida Watty Vos, mester tin placa pa soluciona e problema di dump cu ta afecta e mas di 120 mil hendenan cu ta biba riba e pida baranca aki.
Esaki ta mustra un bes mas cu prioridadnan ta sigui robes den e gobierno aki. Prioridad por a bay pa salud di hende of medio ambiente, sinembargo esaki no ta e caso. Cada rato cu por, ta saca potret cu paharito entre otro pero keto bay e rais di e problema mes no ta wordo tuma na serio y no ta wordo duna e atencion necesario, sr. Oduber a termina bisando.
Expresionnan haci den e articulo aki no necesariamente ta refleha opinion di ArenaPoliti.co