Parlamentarionan di MEP Evelyn Wever-Croes y Xiomara Ruiz-Maduro a reuni cu e delegacion di IMF diamars ultimo. 

"Durante e reunion cu IMF nos a toca varios tema. Entre otro e hecho cu tur cos ta stagna na Aruba, inversionistanan y comerciantenan no ta inverti, cuidadanonan no ta cumpra cosnan di balor, pasobra nan no sa kiko ta bai pasa cu e medidanan na caminda. E problema mas grandi ta debi na e falta di informacion di parti di gobierno" segun Evelyn Wever-Croes. Locual e parlamentarionan di MEP a enfatisa ta cu no solamente falta hopi informacion, sino cu tin hopi manipulacion di informacion y esey tin tur hende confundi. Tambe a cuestiona e fuentenan cu algun minister ta usa pa informacion, pasobra no ta tur ora ta usa cifranan di CBS. 

"Cuidadanonan no ta durf di cumpra un auto pasobra e no sa con e medidanan lo impacta nan entrada, pero ora e mesun cuidadano habri corant e ta mira prome minister Eman ta bisa cu tur cos ta bon na Aruba. E confusion aki tin tur cos pega na Aruba y nos no ta bayendo ni padilanti ni patras. Mas y mas nos hendenan ta conciente cu algo mester cambia, asina nos no por sigi".

‎"E posicion di debe di nos pais tambe a wordo discuti, y e tantisimo proyectonan PPP cu gobierno ta papia di dje. IMF ta un instancia cu ta tene cuenta cu e tipo di fiansanan aki tambe. E tema di "economia berde" tambe a wordo discuti. IMF na 2013 a avisa Gobierno cu e plannan di 100% energia berde no ta realistico. Awor por constata cu hopi ta wordo papia riba energia berde, pero no tin ningun resultado. Es mas, e rebaho di prijs di crudo cu por a duna e pueblo un alivio den prijs di coriente, a wordo nenga na nos pueblo, debi na e contract di hedging di WEB.‎ Y esaki ta stroba nos cuidadanonan di inverti den nos compania. 

‎IMF tabata hopi interesa pa sa si nos comunidad ta conciente cu gobierno ta gastando mas cu e ta ricibi. Nos a splica cu debi na e hecho cu mas cu mita di nos comunidad ta biba den pobresa, e prioridad den e hogarnan ta pa sobrebibi cada luna y nan no ta mucho interesa den e presupuesto di gobierno, pero berdad si ta cu tur hende ta di acuerdo cu cos no por sigi asina mas, cu cosnan mester cambia.

Tambe nos a toca e tema di inversionnan, pasobra ya na 2013 IMF a constata cu ta apenas 1.5% ta bai den inversion, pero CFT awor a constata cu ta menos di 1% a bai den inversion.‎ Nos a keda satisfecho di por a delibera cu IMF riba diferente topico y nos a haya hopi informacion, y nos ta keda pendiente pa e rapport final" Evelyn Wever-Croes a duna di conose. 

‎IMF lo emeti un comunicado di prensa fin di e siman aki, y e rapport mes ta keda cla dentro di dos luna. 

Expresionnan haci den e articulo aki no necesariamente ta refleha opinion di ArenaPoliti.co