Nos ta tumando nota cu varios medidanan ta den proceso pa ser implementa riba nos pueblo riba varios tereno. Asina nos a tuma nota di e aumento inhusto di e tarifa di coriente, e aumento di BBO, e aumento di Grondbelasting, etc., etc.

Un di e puntonan di mayor preocupacion pa tur instancia, manera IMF y secretariado di Cft, ta e.o. e situacion financiero di AZV. Ta conoci cu gobierno mester bay tuma medidanan pa salbaguardia e fondo di AZV, y probablemente nos pueblo lo bay conoce un aumento di e prima di AZV y tambe introduccion di e asina yama "eigen bijdrage".

Tempo cu AZV a wordo implementa, esaki a ser implementa sin ningun clase di mechanismonan di control, consequentemente hopi ta esnan cu a abusa di e situacion aki.

Despues cu mi persona a forza pa bin cu e mecanismonan di control necesario, nos por a ripara cu toch tabatin cierto dunadornan di servicio di AZV cu a trata tur manera pa burla di nos ley di AZV. Asina tin varios botica a haya nan mes ta paga back loke nan a cobra di mas, y alabes tin algun dunadornan di servicio tambe mester a paga back loke nan a cobra di mas.

Tin un specialista cu te hasta a bay te Hoge Raad pa purba di demostra su inocencia, pero envano; te hasta eynan a ser proba cu ela haci su mes culpabel na cosnan cu no tabata corecto. Y medidanan a ser tuma contra su persona.

Pero segun mi por a compronde, e gobierno aki a deshaci di e sancion cu mi persona a impone riba e specialista aki, pa awor e ta cana rond manera "yo no fui"! 

Varios luna pasa a yega na mi conocemento cu casi mesun actonan contra ley y contra etica medico, comparabel cu loke e specialista Lacle a comete den pasado, a ser haci door di un of mas specialista cu ta traha den OK di HOH.

Mi a haci e minister Schwengle varios biaha e pregunta si ta berdad esaki y si tin un investigacion ta tumando lugar al respecto, y lamentabelmente nunca mi a haya un contesta riba esakinan.

Un di e specialistanan cu supuestamente lo ta involvi, a ser poni como director interino di HOH door di e minister aki. Y segun mi por a compronde, e minister a ser poni na altura cu tin un investigacion al respecto. Ta un berguenza cu un minister ta apunta un persona - cu supuestamente ta bow investigacion - den un posicion asina clave, particularmente ora cu un di e tareanan ta pa percura cu mediconan no ta cobra di mas cerca AZV.

Ya cu mi no ta haya un contesta ni reaccion di minister, ni tampoco di e Hunta di Supervision di HOH, mi kier haci un otro intento, awor cerca AZV, pa haya sa si ta berdad cu tin un investigacion a, of ta tumando lugar riba e asunto aki. Pasobra ta inaceptabel cu di un banda nos pueblo ta bay wordo masacra cu medidanan asina drastico door di AZV, mientras cu di otro banda, nos tin un of mas specialista ta haci maluso di AZV, y ta "get away" cu ne tambe.

Mi ta spera cu pronto AZV bin dilanti cu informacion al respecto. Tempo di actonan incorecto di dr. Lacle y otronan, tur cos a wordo poni den publicidad, pues mi no ta compronde dicon awor tin tanto secrecia rond di esaki.

Pueblo mester sa kiko ta pasa cu su seguro medico general. Y si AZV scohe pa e tambe keda keto, e ta mes of mas culpabel den e actonan corupto aki.

Den nomber di Union Patriotico Progresista – U.P.P.

Candelario – Booshi – Wever

Brazil, october 22, 2014

Expresionnan haci den e articulo aki no necesariamente ta refleha opinion di ArenaPoliti.co