scirbi pa Nelson Quandt, candidato no.9 riba lista di ReD   

Mi a lanta cu un sentimiento di tenshon, miedo, peso y ansha. Mi a waak e peso y responsabilidad cu mi a pone riba mi mes. Mi tin un vision pa y cu pueblo di Aruba. Un vision cu ta posibel cu ReD Democratico. Un vision unda cu principio, respet y humildad ta reina riba e pais aki. Esaki no ta un vision of sonjo cu ta imposibel. Esaki ta un vision cu nos tur tin den nos man pa logra. Ami so no por hasi esaki posibel pero mi por sende un candela den cada un di nos pa hunto nos por logra esaki. Un candela cu tin den kada un di nos pero cu no ta tur hende sa. Un candela cu una bes cu esaki sende bo lo no por bai bek. E candela cu ta representa honor, respet y coraje. Esun cu maske bo ta duda, tin miedo of ta insigur, e ta mustrabo y guiabo e caminda.

Huntu cu Partido Partido Red Democratico nos a entrega lista pa election 2017. Ta dilanti nos ta bai. No tin “bai bek” awor, no por sconde y mester para firme pa locual cu mi ta papia y para pe. Mi a priminti y awor mi tin cu cumpli. Mi a duna mi palabra y esei ta conta pami. Sin mi palabra kende mi lo ta? Cumpli cu bo palabra ta forma bo karacter.

Ta facil pa para un banda y waak, keda scondi den e masa, of duna bo opinion y jusga. Esei ami tambe a haci pero ora cu bo bira consiente di esei bo ta realisa cu bo tin un otro alternativa. Pone esei un banda y busca e cosnan cu ta traha pa nos tur, bo persona y otro. E mundo no ta dimi so of dibo so, mundo ta di nos tur. Ta hunto nos tin cu comparti esaki.

Mi tarea cu mi a pone pami mes no ta un facil, esei mi sa pero na mes momento mi ta sigur cu esaki lo logra. E lo logra ora cu nos cada un cuminsa mira kiko nos ta haci di berdad, cada acto tin su consecuensia. Pa bo mes, bo ser keri y pa nos tur. E ta logra ora cada un di nos tuma e reto. E reto pa bai dilanti, progresa, solidarida y para pa locual bo ta kere. E lo logra pasobra mi ta kere den NOS PUEBLO. SENDE E CANDELA CU BO TIN PADEN I TUMA E RETO!


Bo sirbidor,
Nelson Quandt

Expresionnan haci den e articulo aki no necesariamente ta refleha opinion di ArenaPoliti.co