ORANJESTAD – Candidato #6 riba lista di Partido di Pueblo Arubano AVP, Mervin Wyatt-Ras a resalta e inclusion cu cual e partido a realisa su programa di partido y hunto cu e ekipo di su coleganan candidato ta e opcion pa ta mas integral y capacita pa dirigi nos isla riba e caminda di progreso, bienestar y felicidad.

Durante e presentacion oficial di e documento, algun dia atras, Wyatt-Ras a dirigi su mes na e publico bisando cu un di e retonan cu nos tin como pais ta: ‘Con nos ta brinda oportunidad pa cada hende haya e hermentnan pa construi un miho bida?’ AVP a puntra pueblo mes pa duna su opinion via programa 1000Voz.

Adicionalmente, Prome Minister Mike Eman mes a cana tur siman den barionan rond di nos isla pa papia cu famianan di loke realmente ta pasa den nan bida. Durante Wyatt-Ras su propio bishitanan na casnan tambe el a scucha kico nos hendenan mes kier y con nan ta pensa cu mester haci’e. “A base di loke ciudadanonan mes a bisa nos, nos a traha un plan. Mescos cu nos a traha plannan pa atende cu e caida economico durante e crisis mundial y su consecuencianan, nos ta brinda awe un plan con pa yuda carga nos famianan y construi un futuro hopi mas sostenibel pa nos tur. Nos ta entusiasma pa brinda nos programa di partido ‘Aruba Padilanti: 2017-2021’.

Mervin Wyatt-Ras a splica con a ripara cu institutonan tradicional manera den enseñansa, e organisacion di servicionan publico y priva y hopi di nos leynan, ya no ta satisface suficientemente e expectativa y e demanda di pueblo. Nos enseñansa, servicionan publico y priva, proceduranan existente, ley y reglanan cu nos a custumbra cu nan, tur mester wordo renoba pa nan sirbi mas como instrumentonan pa yuda y facilita esfuersonan y iniciativanan di nos hendenan, hoben y adulto.  

AVP tin un propuesta riba tereno di renobacion y expansion di economia, di creacion di cuponan di trabou, di facilidadnan financiero y oportunidadnan creativo. Nan ta e tipo di oportunidad cu pueblo mes a pidi pa nan; pa crece y crea un bida stabil pa nos mes y pa nos famia. Pero pa cada un di nos di berdad haci bon uzo di e oportunidadnan nobo aki, nos mester percura pa nos tin e informacion, e instrumentonan, e condicionnan necesario y e sosten adecuado di Gobierno of companianan envolvi. 

“E renobacion di enseñansa, servicionan publico y priva, uso di tecnologia nobo y un cooperacion mas estrecho entre sector publico y priva mester percura pa duna cada un di nos e instrumentonan aki. Esey lo percura pa nos lo por haci miho uso di oportunidadnan nobo. Esey ta exactamente loke AVP ta bay haci pa sigura cu nos tur ta bay Padilanti, mientras cu Aruba ta bay Padilanti!,” asina Mervin Wyatt-Ras a finalisa bisando.   

Expresionnan haci den e articulo aki no necesariamente ta refleha opinion di ArenaPoliti.co