AVP na MEP: no blof cu bo tin cumprado. Hiba nan serca Valero na Texas! 

"Den un reunion publico di parlamento e lider di MEP a declara cu nan tin companianan cu lo por habri e refineria mayan! Ela declara cu tin portanan cu ta habri p'e y no pa e lider di AVP. Entre MEP y PDR hunto nan tin por lo menos 7 compania pa cumpra e refineria y pone bek den operacion. Nan mes a bisa esey na mas cu un ocasion. Wel nos ta urgi MEP y PDR pa cumpli cu e pais aki. Haci loke boso ta bisa cu boso por haci: habri e refineria manera boso ta bisa cu boso si por. Haci algo positivo pa e pais aki." Asina Rene Herde' a declara riba e pregunta si e ta kere cu MEP/PDR si por habri e refineria.

CONTRIBUCION DI E REFINERIA
Pa AVP e importancia di e refineria ta sin duda. Despues cu e tabata sera pa casi cinco aña, ta AVP a uza e "un porciento" di chens pa habri e refineria cu tanto oposicion ta papia didje y AVP a habri'e. Ta AVP a bay Texas serca e doñonan di e refineria pa yega na un acuerdo pa bolbe habri e refineria. E acuerdo a bay parlamento y MEP a vota contra! E lider di MEP a sali di e reunion pa e no mester vota. Awe e mes un MEP cu e mes un lider, kier haci comosifuera nan si kier pa e refeneria habri. Den e mes un reunion publico ey di dia 29 di mei 2010, MEP a entrega un mocion den cua nan a desaproba e acuerdo cu gobierno di AVP a sera cu VALERO pa habri e refineria. Anto awe e mes un MEP aki kier gaña pueblo cu nan si kier habri e refineria y cu nan si tin companianan cu kier habri e refineria.

CUMPLI
Segun AVP, MEP mester haci loke nan a bisa awor. MEP mester CUMPLI cu Aruba awor! MEP no mester tarda of pospone mas. E entradanan cu e refineria por crea pa Aruba ta enorme. Sin papia di e cuponan di trabou bon paga. Kier men cu cada dia cu MEP tarda, ta Aruba ta perde.......si ta berdad anto cu MEP por habri e refineria. Rene Herde a bis'e masha cla: "Si MEP di berdad tin compania pa habri e refineria y si e lider di MEP por drenta unda niun otro hende por, pa habri e refineria, anto nan mester haci'e awor. Enbez di para na banda critica y lanta spreransa falso, MEP mester contribui na Aruba awor. Si MEP ta stima e pais aki di berdad, nan por preuba esey awor. Ban wak si MEP ta stima e pais aki."

(Inclui aki ta copia di e lista di votacion den Parlamento pa e ley pa aproba e acuerdo pa habri Valero di mei 2010) 

Expresionnan haci den e articulo aki no necesariamente ta refleha opinion di ArenaPoliti.co