Den cuadro di e celebracion di nos dia nacional, dia di Himno y Bandera, Minister di Cultura Otmar Oduber ta expresa su entusiasmo pa e magno evento cultural 'Un canto pa nos Himno y Bandera' cu a inicia diamars riba Plaza Turismo Linear Park. 
Minister Oduber a indica di ta hopi entusiasma mes cu e motor cu tin poni patras di e dos organisacionnan cu semper a organisa esaki, tanto pa e organisacion di e festival na Tanki Leendert como tambe e organisacion di Sr. Harry Croes.
Ambos fundacion a uni e aña aki pa asina haci di dos evento chikito un evento grandi cu ta brinda realse na nos folkore. E combinacion di e aspecto di nos muchanan y hobennen cu e adultonan. 
Aña pasa tabata e prome aña cu a purba algo riba Plaza Turismo , cu a resulta di ta sumamente exitoso. Mi ta kere esey a pusha ambos organisacion y comicion e aña aki, unda ta mira un cantidad record di particpantenan cu a haci  cu e anja aki tin 3 anochi di pre-final, di cual diasabra ta final di e muchanan y diadomingo di hende grandi, e mandatario a splica.
Esaki ta un indicaion cu e mensahe ta drentando poco poco den nos cuminidad. Esaki den combinacion cu e proyecto cu tin andando Resona, caminda ta  trece cancionnan di antes di esnan di empocanan anterior cu a mantene nos cultura, den un bachi nobo riba nivel halto di produccion y voz di artistanan hoben, sigur lo logra e  meta pa salvaguardia nos folklore y traspasa esaki di un generacion pa otro.
E magno evento den cuadro di e celebración di nos Himno y Bandera, ta sigui di ta un actividad cultural cu a crece bira grandi e ultimo añanan aki.
Gobierno hunto cu Departamento di Cultura ta duna un man y ta sostene e actividad aki full, pasobra ta aki ta unda ta cuminsa cultiva esnan cu mester carga nos cultura. 
E festival di Un Canto pa nos Himno y Bandera ta wordo acompaña pa mas cu 40 tent cu cuminda crioyo, artesania local, accesorionan di celebracion di Himno y Bandera y mucho mas.
Hunto cu esaki den cuadro di e celebración di nos dia Nacional di Himno y Bandero lo cuminsa decora cayanan di Aruba cu nos bandera den su color original y asina aki mustra patriotismo, y mustra e Arubianismo cu nos tur ta biba riba e pida baranca por sinti nan mes orguyoso pa celebra nos himno y bandera . 
Banda di esaki día 16 di maart lo tin e presentación di proyecto Resona den Cas di Cultura y día 17 di maart lo tin diferente actividadnan rond di nos isla cu lo honra nos cultura y herencia. 
Minister di cultura Otmar Oduber ta invita Aruba completo pa brinda sosten na nos participantenan chikito te grandi riba plaza turismo.

Expresionnan haci den e articulo aki no necesariamente ta refleha opinion di ArenaPoliti.co