Esaki ta confirma y renoba e compromiso pa sigui traha pa nos pais y nos pueblo 

ORANJESTAD – Despues di a pasa e mainta bishitando habitantenan di Yuwana Morto Complex, ehempel di un bario cu ta yama e concepto di sostenibilidad bon bini y ta muestra di sentido comunitario, Prome Minister Mike Eman tabatin e placer di a wordo informa riba e premio cu Aruba a haya como ‘Destinacion di Liderazgo’ den e World Legacy Awards di National Geographic. El a comparti e sentimento di satisfaccion cu su coleganan di Gabinete di Ministernan cu como un ekipo ta traha riba e vision di sostenibilidad y bienestar socio economico.

Aruba a bira merecedo di e premio aki pa su vision y esfuersonan haci riba tereno di desaroyo sostenibel y tambe con esakinan ta traduci nan mes den e industria di turismo. Momentonan asina ta yena nos tur cu un sinti di satisfaccion y orguyo, pero tambe di un compromiso renoba pa sigui traha na bienestar di nos pueblo y nos pais.

E categoria di Destination Leadership ta reconoce e liderazgo di un destinacion, incluyendo ciudad, provincia, estado, pais y region cu ta demostrando e miho practica ambiental, proteccion di herencia cultural y natural, beneficio pa e comunidad local y ta educa su bishitantenan riba e principionan di sostenibilidad.

Den e premionan a participa un total di 260 diferente destino. Den e categoria aki, Aruba tabata e top 3 finalista hunto cu Delaware North Companies Parks & Resorts na Yosemite National Park, Merca y Val D’Aran, Spaña.

E descripcion di Aruba ta menciona entre otro e relacion di cooperacion cu ta existi Carbon War Room y con Aruba ta demostrando loke ta posibel den e lucha global contra e cambio climatico. “Cu hopi recurso di solo y biento, Aruba a inverti grandemente den energia renobabel y ta trahando den direccion di e meta pa bira e prome pais na mundo cu ta liber di combustibel fosil pa 2020.” Tambe ta menciona con di parti di Aruba Tourism Authority ta traha cu doñonan di negoshi pa crea ‘destinacionnan cu por cana’ dor di adapta nan modelo di ‘smart growth’ y baha dependencia di auto.

Algo hopi importante cu tambe a keda remarca den e argumentonan pakico Aruba ta merece e premio aki ta cu seis otro isla den Caribe awo a adapta e ‘Modelo Aruba’ y ta pusha nan mesun transicion den direccion di bira destinacionnan mas sostenibel.

Gabinete Mike Eman II ta wak e premio aki como un estimulo mas cu ta alimenta e determinacion pa cumpli cu e metanan pone nos dilanti como pais y como comunidad. Aruba ta bon riba e caminda pa bira un pais modelo na mundo, pero mas importante ainda ta cu, Aruba ta birando un pueblo cu ta economicamente stabil, su ciudadanonan ta gosa di un nivel halto di bida mientras cu na mesun momento ta respeta e medio ambiente.

Expresionnan haci den e articulo aki no necesariamente ta refleha opinion di ArenaPoliti.co