Cu hopi atencion partido UPP ta bin ta sigui e desaroyo tocante e aumento di e asina yama “schoolgeld” pa loke ta concerni scolnan cu ta cay bo di Stichting Katholiek Onderwijs Aruba (SKOA).
Mirando cu e siman aki SKOA ta habriendo no solamente inscripcion, sino un re-inscripcion pa scolnan catolico, sin cu e asunto di e aumento aki no a keda regla ni cu Gobierno, ni cu e mayornan, UPP ta kere ta bon pa por medio di un carta abierta haci algun pregunta tanto na Gobierno di Aruba, como na e prome responsabelnan pa nos educacion aki na Aruba, na Parlamento di Aruba cu tin di controla gobierno, directiva di SKOA cu tin di percura pa educacion wordo duna, y tambe na SIMAR, cu ta representantenan di e maestronan, cu te dia di awe nos no a tende mucho di nan ainda.
Pa cuminsa nos tin di apunta, cu nos estado di derecho, ancra den Constitucion di Aruba, ta provee claramente den articulo I.20 cu enseñansa mester ta un asunto di “aanhoudende zorg”, loke ta nifica cu Gobierno mester garantisa educacion/enseñansa general, paga for di caha di Gobierno (lesa pagadornan di belasting). Naturalmente tin diferente otro aspectonan cu ta wordo regla detayamente den otro leynan, manera esunnan di ley pa enseñansa preparatorio, basico, special y avansa.
Gobierno pues na ningun momento por core pa su responsabilidad. Nos constitucion mes tambe ta deriva for di esun Hulandes, cu hasta ta bay mas leu ainda. Pero en todo caso, banda di e ley aki nos tin di reconoce cu tin aspectonan di ley internacional cu tambe ta valido pa nos. Particularmente e ley internacional/tratado di Derechonan di Mucha. Articulo 28 ta papia cla aki cu mucha tin derecho riba enseñansa basico cu ta gratis y obligatorio. E demas leynan menor cu ta regla nos enseñansa pues, ta sali for di e principionan aki. Pues loke ta bin ta sucediendo na e momentonan aki, esta cu SKOA, dor di no por yega na un conclusion satisfactorio cu Gobierno, ta tira tur peso riba e mayornan, na unda cu poco poco nos ta bolbe ta creando un enseñansa di clase (mescos ora ta papia di husticia di clase). Mientras cu scol basico mester ta gratis y obligatorio (un ley cu recientemente a keda pasa por cierto), nos ta wak cu ta exigiendo un “schoolgeld”, cu ya caba a wordo tolera na un suma cu tur hende a acepta.
UPP p'esey tambe ta kere cu mayornan tin e derecho di keda sin paga e aumento cu a wordo presenta, mientras cu e asunto di re-inscripcion tampoco segun nos no ta na su lugar, mirando cu ya caba e alumnonan cu ta bishitando scolnan di SKOA, ta inscribi.

*Nos preguntanan na Gobierno ta:
1. Kico ta para cu e muchanan, na momento cu SKOA realmente nenga alumnonan nobo y alumnonan cu no a re-inscribi, un cupo na e scol?
2. Ki plan di contingencia minister di enseñansa tin pa acapara e posibel rechasonan di alumnonan na scolnan catolico?
3. Gobierno ta preparando suficiente cupo na e scolnan publico y tambe maestronan pa por educa nos muchanan cu wordo nenga?
4. Minister a sinta cu e Departamento di Scolnan Publico pa trata e posibel alternativanan?

* Tambe UPP tin pregunta pa Parlamento di Aruba:
1. Ki accionnan Parlamento di Aruba a tuma te na e momentonan aki?
2. Dicon no a yama reunionnan cu stakeholders y no a yama minister di enseñansa “ter verantwoording”?

* Nos preguntanan na SKOA ta:
1. SKOA a studia e materia aki debidamente pa asina evita di por haye den problemanan huridico pa motibo di ta trapa riba derecho y obligacion di enseñansa di e mucha cu nan nenga un cupo?
2. SKOA ta consciente, cu e subsidio cu e ta hayando, ta mara na e cantidad di alumnonan cu wordo inscribi na cada scol, y cu den caso di un disminucion den e cantidad, esaki tambe ta ensera un rebaho riba e subsidio?
3. Con SKOA lo sigui atende cu su gastonan di salario di maestronan, mantencion, etc. na momento cu bini un reduccion riba e subsidio cu lo ricibi pa cabes di alumno?

* Preguntanan cu UPP tin pa e representacion di maestronan:
1. Kico ta e motibo cu te ainda sindicato SIMAR no a pronuncia su mes den e asunto aki?
2. Kico sindicato ta pensa riba e derechonan inalienabel di nos muchanan riba enseñansa gratis?
3. Sindicato SIMAR a prepara su mes den caso cu bini un reduccion di e subsidio a causa di un caida di alumnonan, pa loke ta trata cortamento den sea salarionan di maestro of cuponan di trabou di maestro?

Pa UPP esakinan ta preguntanan importante pa atende, y cu ta bon pa nos Pueblo haya e claridad necesario riba e asuntonan aki.
For di un prome momento, UPP no tabata kere cu mester a bringa e aumento di “schoolgeld” aki simplemente como un gasto adicional (loke e ta tambe, esta un peso extra den e temponan dificil aki), sino mas bien riba e aspecto legal y di nos estado di derecho, y e derecho di e mucha.
UPP, manera nos a vocifera den nos programa di Eleccion 2013, ta kere den un enseñansa cu ta duna tur individuo e oportunidad igual pa asina desaroya su mes, ya cu enseñansa mester keda un enseñansa di INCLUSION y no di EXCLUSION. Si e “toets” cu ta wordo haci hustamento ta percura pa exclusion, nos ta kere cu “schoolgeld” tambe lo desemboca den exclusion.
UPP ta urgi na mayornan, pa bira mas critico y no sin mas doblega pa un asunto cu parce di ta regla caba entre Gobierno y SKOA, apesar cu tur e comedianan cu ta wordo hunga, ta pretende lo contrario.


Den nomber di Partido Patriotico Progresista – U.P.P.
Candelario A. S. D.  - Booshi - Wever
Brazil, maart 24, 2015

Expresionnan haci den e articulo aki no necesariamente ta refleha opinion di ArenaPoliti.co