MEP A PRESENTA UN NOTA DI INTEGRIDAD DESDE MEI 2014 

Durante conferencia di prensa di MEP, lider di MEP Evelyn Wever-Croes a expresa su lamento cu parlamentarionan di AVP kier pretende di papia di integridad, pero ta malusa esaki pa susha nomber di hende.

“Laga nos debati riba integridad, MEP ta bogando pa esaki pa mas di un anja caba durante reunionnan tripartiet den Reino, pero cada biaha AVP ta haya atake di panico y kier stroba esaki. Den nos nota, cu nos a presenta na mei 2014, nos tin inclui un Codigo di Conducta pa minister y parlamentarionan, pero esaki tampoco parlamentarionan di AVP kier debati riba dje.

Awor diripiente, djis pa lastra nomber di hende drechi, kier pretende di ta papia di integridad. Mi ta reta tur parlamentario di AVP cu kier debati riba integridad, pa e debate aki. Ban debati riba e tema aki for once and for all y introdusi reglanan di integridad y codigo di conducta. E ora nos por discuti si ta aceptable, cu un persona di cual su casa ta consehero di minister, por ta parlamentario. Si otro persona cu su casa ta abogado di un proyecto miyonario di gobierno, por ta parlamentario. Si otro persona cu tin un strafblad, cu a wordo acusa den ladronicia den pasado, por ta parlamentario. Si un persona cu a yega di dal hende mata cu auto, por ta parlamentario. Si un parlamentario por ta parlamentario y ta sigi opleiding di scol di polis parew.  Ban introdusi reglanan y despues ehecuta nan”, Lider di MEP a trese padilanti.

INTEGRIDAD DEN REINO
Sra. Wever-Croes a lamenta tambe cu nada ta wordo hasi riba e tema aki pa Aruba por hasi un bon papel den Reino, y probablemente esey ta e motibo cu AVP a saca su persona afo di e comision di Reino. “Aki algun siman tin un otro reunion di IPKO na Hulanda, y atrobe Aruba mester pasa berguensa cu ta nos so no tin ley ni regla riba e tereno di integridad. Esaki ta refleha malo riba henter nos pais, djis pasobra un grupito kier tapa pa e cosnan iregular cu ta pasa na Aruba cu tin asina tanto conflicto di interes. Nos di MEP si tin tur nos documentonan prepara y bon documenta pa dia nos bai e reunion ey na Hulanda, pasobra nos nota ta cla desde mei anja pasa caba. Nos lo probecha di entrega e Nota aki na esnan responsabel, pa asina tur hende tin conosemento di e Nota aki prome cu e reunion na Hulanda”.

ATAKENAN PERSONAL CONTRA PARLAMENTARIONAN DI MEP
“Mi a ripara cu en bes cu e parlamentarionan aki traha riba regla y norma pa integridad, of pa soluciona problemanan di conflicto di interes, nan ta prefera di sconde tras di e capa di integridad pa lastra nomber di hendenan drechi. Un cos mi ta bisa e parlamentarionan di AVP: si bo tin sospecho of prueba cu un persona a comete un acto castigable, e ta bo deber di bai Ministerio Publico y entrega keho. Si bo no hasi esaki, bo ta mes of mas culpable cu esun cu por a comete e acto castigable. Como parlamentario bo mester mustra ehempel: tuma accion, y no sinta djis tira lodo y susha nomber di hende, pasobra aki poco tempo ningun hende ta kere bo mas. Y mi ta urgi prensa tambe pa ta mas critico, no djis sinta scucha e mesun storianan aki cada biaha, pero exigi di e parlamentario cu e ta bai entrega keho, sino e mester keda keto”, lider di MEP Evelyn Wever-Croes a expresa cu firmesa.

Expresionnan haci den e articulo aki no necesariamente ta refleha opinion di ArenaPoliti.co