PRESUPUESTO NO TA BON PREPARA, GASTONAN DI MIYONES ‎SIN SPLICACION

ORANJESTAD -- Parlamentarionan di e tres fraccionnan ta den proceso di studia e presupuesto. E tratamento a cuminsa y parlamentarionan mester a entrega nan preguntanan diaranson ultimo 8 april.

"Nos a tuma tempo pa studia e presupuesto y nos a reuni cu varios di nos conseheronan. Hunto cu demas candidatonan di partido nos a prepara como 600 pregunta riba e presupuesto" Lider di MEP a duna di conose.

Locual mas a resalta pa e fraccion geel ta cu e presupuesto tin miyones na gastonan sin cu ta duna un splicacion pakiko. "Esey ta ponebo pensa cu sea nan a traha con cu ta, of cu tin algo di sconde. Nos a concentra mas tanto riba e gastonan di e ministernan, manera personal (coordinador), gasto di biahe, gasto di huur, gasto di consehero y abogado. Nan ta considerable y den sigiente dianan nos lo presenta nos analisis mas profundo. Bo por conclui cu gobierno a corta den servicio y asistencia di esnan mas vulnerable pero no kier corta nan propio gastonan.

Un otro aspecto hopi importante pa nos a evalua ta si e presupuesto ta realistico. Por ehempel un minister a presupuesta 20 mil florin pa biahe e anja aki, pero ya na maart el'a gasta casi full e suma. Asina. tin hopi mas ehempel. Tipo di cosnan asina ta ponebo duda si e presupuesto ta realistico si of no. Un otro aspecto cu a resalta ta cu tur e ministernan ta pone metanan masha bunita pero no ta pon'e den practica. Cu otro palabra, hopi papiamento, poco accion. En todo caso nos mes por a constata cu manera Raad van Advies a bisa y Banco Central tambe, cu e presupuesto aki no ta cumpli pa soluciona e problema financiero di Aruba. Nos ta spera di haya contesta riba nos preguntanan pa asina nos prepara pa debate den Parlamento" Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co