Cu hopi fanfaria y cu fiestamento dia 16 di october 2014, e firmamento di e "proyecto" di un hotel di 5 strea a tuma lugar den e Carubbean Festival. Durante e fiestamento aki cu placa di pueblo, a ser anuncia cu e construccion lo cuminza na februari 2015. No a dura mucho cu Otmar Oduber a laga nos sa cu e "GROUND-BREAKING" pa dicho proyecto a wordo retrasa y lo tuma lugar na maart 2015. Awor nos ta na mitar di april 2015, y ni foe ni fa di un ground-breaking. Atrobe ta un promesa falso? Ta esaki e pueblo di San Nicolas merece?

Den e siman di 15 di october 2014, corantnan tabata yen di elogio pa tanto Otmar O. como pa Mike de M. pa e logro grandi di trece porfin un proyecto di e magnitud cu a wordo priminti na diferente ocasion, y kiko e realidad amargo ta probablemente atrobe: un biaha mas pueblo di San Nicolas ta wordo sacrifica y engaña, dunando e pueblo, cu ta muriendo di sed, un botter di awa bashi??

Ministernan a declara cu tur cos tabata "in kannen en kruiken"; pero dicon anto e retraso pa ehecuta e proyecto aki,
of ta para e proyecto a ser para den su totalidad??
Por ta cu e inversionistanan lo a aumenta nan set di exigencianan pa por start cu construccion di e hotel, exigencianan cu gobierno no kier cumpli cu nan? Por ta tambe cu a yega na cierto palabracionnan riba terenonan cu awor no kier
of no por cumpli cu nan?
Mi ta spera cu un biaha mas, no sera combenionan cu mayan e inversionistanan aki bin exigi daño di perhuicio pa pueblo un biaha mas mester bay paga un dineral. Y nos conoce Mike de M. cu ya caba a testigua contra nos Pais, cu
a costa nos mas di 30 miyon dolar. Esaki danki na Mike de M. su acto di traicion contra e pueblo Arubano.
Cuidow cu un di e palabracionnan no ta, cu e beach mas bunita di Aruba, cu ta e orguyo di San Nicolas, esta Baby Beach, lo mester forma parti di e proyecto. Aparte cu esaki ta contra nos leynan vigente, esaki lo ta un crimen (mas) contra nos pueblo di Aruba en general y e pueblo di San Nicolas en particular. Y segun mi informacion cu esaki ta un di e exigencianan di e desaroyadornan for di un principio.

Den ambos caso ambos minister un biaha mas ta cometiendo actonan inaceptabel contra nos pueblo. Den e caso cu esaki ta e exigencia, anto tanto Otmar O. y Mike de M., mester carga e consecuencia di esaki, pasobra nan mester por sa cu esaki ta inaceptabel. Y apesar di esaki, ta haci tanto fanfaria cu e proyecto fantasma aki.

Tanto gobierno como e fraccion di AVP, mester duna un claridad riba e situacion aki. Pueblo di Aruba tin derecho pa sa kiko tin di berdad cu un biaha mas ta gobernantenan ta gaña. Mi ta spera cu e biaha aki si ni Otmar O. ni Mike de M. no get away.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 12, 2015

Expresionnan haci den e articulo aki no necesariamente ta refleha opinion di ArenaPoliti.co