Na 26 di Maart mi a publica e articulo: "Cero tolerancia pa cu abuso di maestronan!". Awemainta mi ta lesa den corant cu un cabezante di un scol a ser agredi. Aki na Aruba mes! Con e por ta posibel, cu maestro ta wordo agredi na pia di trabou y cu AVP ta baha e gastonan di seguridad na scol di 1.543.200 florin pa solamente 564.300 den e presupuesto di 2015? A resta solamente 36,5% di locual a wordo presupuesta aña pasa. Esey kiermen di cada 3 security cu tin awor na scol, AVP lo kita 2 di trabou! Minister Hooyboer-Winklaar ta  condena e atake riba e cabezante, pero e mes ta e bully mas grandi den mundo di Enseñansa. Dos siman pasa, henter Aruba por a wak e debate cu a mustra cu ningun di e 7 maestronan den e fraccion di AVP a scohe pa sali na defensa di nos maestronan. Tur a vota pa nan partido, tur a scohe pa laga pueblo cay y pa sostene nan partido. Tur a demonstra cu no mester respeta un maestro. Den votacion, tur a sostene e actonan illegal di Minister Hooyboer-Winklaar. 

Pakico abuso contra maestro ta subi? 
Rond mundo e atakenan riba maestronan ta birando un crisis nacional. Tin un dicho cu ta bisa, cu solomente ora cu bo ta lanta pa bo derecho, bo por gana respet. Asumiendo cu e dicho aki ta berdad den bida real, nos lo por conclui e ora ey, cu si nos, como maestronan, no ta wordo respeta, cu esey lo ta pasobra nos no ta sali na defensa di nos mes? Ta conoci, cu maestronan ta sinti un responsabilidad masha grandi pa cu e educacion di nan alumnonan. Esey ta e causa pa maestronan no sali na defensa di nan propio derecho? Ora un hende ta sinti su mes intimida, tambe e lo keda sin defende su mes. Un abusador ta intimida bo na un manera, cu bo ta kere cu bo no tin poder, cu bo ta perde e curashi pa vocifera bo opinion y sali na defensa di bo mes y sinti cu bo no tin e poder mas pa lanta pa bo mesun derecho. Locual Minister Hooyboer-Winklaar a haci, ta un acto di intimidacion, di abuso di poder contra nos como maestronan. No mester acepta esaki. Esaki no ta e unico actonan di abuso: Nombracion politico na EPI y na DPS, castiga schoolbestuurnan, intimida sindicatonan, retira of schors maestronan sin un base legal y awor e ta bay baha e siguridad na scol. Un otro decision inprofessional y inacceptabel. 

Kico ta causa e agression contra maestronan? 
Un estudio di American Psychological Association cu ta yama 'Silent National Crisis', ta mustra cu hopi biaha e no ta falta di e maestro of maestra cu nan ta wordo agredi, pero cu tin otro factor. Por ehempel, problemanan social den communidad, den famia of entre alumnonan por 'trigger' agresividad contra un maestro. Awor cu tin masha hopi famianan den situacionnan financiero penoso, pavia di a medidanan di AVP y ainda falta mas pa wordo implementa, kico nos por spera? Si na cas no tin sosten pa e muchanan y na scol e maestronan tin cu percura pa nan propio siguridad, ta ken boso ta kere ta sali como e gran perdedor? Ta nos mes, como pueblo. Awor no ta e tempo pa baha man na seguridad na nos scolnan, pasobra asina nos ta perhudica no solamente e maestronan, pero tambe nos yiunan. Awor cu atrobe un maestro a wordo agredi, un protesta di silencio, maestronan bisti na preto, un walk out, den mi opinion, no ta representa e seriedad di locual a pasa. E no ta un muestra di nos disgusto pa cu locual a pasa cu e maestra di Scol Kudawecha na Nord, ni cu e cabezante di Santa Filomena Colege na San Nicolas. 

A baha e presupuesto pa siguridad na scol cu 63,5%.
Minister Hooyboer-Winklaar a kita un maestra for di un 6e klas. El a haci'e na un forma illegal, inprofessional y sin considera e 'best interest' di nos alumnonan di 6e klas. Ex-Minister di Enseñansa Dowers, a cera Colegio San Antonio, Colegio Arubano y Mon Plaisir Colege pa 3 siman, pavia di falta di planning di construccion y falta di percura pa e salud di e alumnonan y maestronan. Tambe un falta di respet pa nos como maestro. Awel awor ta tempo pa nos mustra cu ta basta! Nos, como maestro, por cera tur scol pa por lo menos un dia, cu of sin un sindicato na cabez y lanta pa nos derecho! Nos tin derecho pa sinti sigur na trabou. Awe e lo ta juf Suki of e cabezante Monty, pero mayan e lo ta abo of porta bo yiu mes cu ta wordo agredi. Si ni un Minister di Enseñansa tin respet pa maestro, si ningun maestro Parlamentario di AVP ta sali na defensa di su ex-coleganan, si mayornan y of alumnonan ta ataca maestronan, ta ken lo proteha nos yiunan ora cu nan ta na scol? Minister Hooyboer-Winklaar a baha e gastonan pa security na e scolnan di 1.543.200 florin pa solamente 564.300, pues gobierno lo no por garantisa e siguridad di NINGUN mucha na scol mas tampoco. Ta p'esey nos como maestronan, pero tambe e mayornan mester lanta hunto pa nos derecho pa tin seguridad pa tur tur hende y na tur scol: maestro, alumno, cabezante, staf y security! Cero Tolerancia pa cu abuso na scol!

Gisele-Mireille Sint Jago

Expresionnan haci den e articulo aki no necesariamente ta refleha opinion di ArenaPoliti.co