ORANJESTAD – Esaki ta e di dos aña cu Aruba ta celebra Dia di Rey, despues cu Willem-Alexander a tuma su luga como hefe di Cas Real di Hulanda cu abdicacion di su mama Reina Beatrix na 2013.

E ceremonia oficial di celebracion, cu un Acto Cultural, a tuma luga den Parke Wilhelmina y a conta cu presencia di un grupo grandi di miembronan di Aruba Scout. E publico cu a acudi tabata mas grandi cu añanan pasa. Algo cu ta mustra, segun un comentario haci door di Prome Minister Mike Eman, e amor grandi cu e pueblo tin pa Cas Real Hulandes.

Ta un tradicion cu riba e dia aki ta haci entrega di varios premio. Na ocasion di celebracion di Aña di Rey, diferente ciudadano ta haya un condecoracion real pa nan dedicacion durante nan oranan liber na formacion di nos hendenan riba tereno social, cultural y deportivo. Varios di nan tabata presente den Parke Wilhelmina y a wordo gradici un biaha mas pa tur e bunita trabounan haci, pabien y forsa pa sigui. “Ohala cu nan por ta ehempel y estimulo pa otronan,” tabata e mensahe di e Presidente di Comision Celebracion Dianan Nacional, Pedro Diaz.  

Pero e mainta aki a wordo uza tambe pa reconoce e logronan di hobennan cu ayudo di nan lidernan adulto. Su Excelencia Gobernador Refunjol a entrega Copa Hubenil Gobernador Felipe B. Tromp na un representante di Grupo Scout San Dominico Noord y e premionan di estimulo na e ganadonan di e aña aki, kendenan tabata Juan Pablo Aguirre y Justin Peña. “E logronan ta debi na e perseverancia di e hobennan, pero tambe nos mester reconoce e trabou di e adultonan, esta mayornan y lidernan cu ta apoya e muchanan. Den e temponan dificil cu nos ta confronta y cu nos hobennan por bira victima di diferente sorto di adiccion, ta na su lugar pa nos elogia tur esfuerso di e hobennan y tambe di nan  mayornan y lidernan cu ta para cla pa yuda nan,” e maestro di ceremonia a bisa di e mensahe di e comision organisado.

Den e celebracion, den cuadro di Dia di Rey, Presidente di Parlamento drs. Marisol Lopez Tromp por ehempel a señala cu ta despues di hopi tempo ta celebrando Dia di Rey en bes di Dia di Reina. El a recorda tambe cu apesar di tur diferencia politico cu por tin entre ciudadano, tin un cos cu nan tin en comun: “Un aprecio grandi pa Cas Real. E Rey ta simbolisa e union fuerte entre nos paisnan den Reino Hulandes,” sra. Lopez Tromp a duna di conoce. Y a agrega cu nos tin un Rey cu ta cla pa retonan di siglo 21. Ademas, manera Gobernador Refunjol a trece dilanti, “Aruba ta celebrando 200 aña di Reino Hulandes y 350 aña di Marina Real. Mi ta contento pa e apoyo semper di Marina Real, cu ta percura pa stabilidad di Aruba.”

Tabata palabranan cu a wordo comparti door di Prome Minister Mike Eman, kende na final di e ceremonia a señala e amor grandi cu semper pueblo tabatin pa Cas Real, apesar di tur diferencia di opinion. “Mi ta sinti hopi entusiasmo awe pa mira e celebracion aki di Dia di Rey. Bon relacion den Reino semper tabata importante pa nos. Nos a inverti hopi den recupera e relacionnan aki, basta nos salvaguardia e derechonan sagrado di nos pais, esta Status Aparte den Reino cu ta trece hopi siguridad,” Eman a duna di conoce despues di a presencia e desfile di e gruponan di scout cu mas di 500 miembro.

Expresionnan haci den e articulo aki no necesariamente ta refleha opinion di ArenaPoliti.co