Luga di sosiego di Libertador Betico Croes lo haya atencion special 

ORANJESTAD – Renobacion di barionan, vision di Gabinete Mike Eman, ta encera henter e concepto di loke un bario moderno mester ta. Asina por ehempel ta drecha iluminacion, pa crea mas siguridad, ta construi edificionan unda cu e pueblo por haya un miho servicio for di Gobierno, pero tambe e ta embeyece e centronan di e barionan. Den cuadro di esaki diaranson mainta Minister Benny Sevinger compaña pa Prome Minister Mike Eman, a anuncia e inicio di e trabounan pa embeyece e parkinglot y bisindario di Misa Immaculada Concepcion den districto di Santa Cruz. “Un dia grandi pa bario di Santa Cruz,” Prome Minister Mike Eman a duna di conoce.

Prome Minister Eman den su declaracion duna e mainta aki a sigura cu den e diseño a tene cuenta cu loke e Iglesia di Santa Cruz y su fielnan ta haya importante, pero tambe e scolnan den bisindario directo. “Awe ta un dia importante pa bario di Santa Cruz pasobra un meta importante cu nos a pone nos dilanti ta pa duna atencion special na nos barionan. Durante hopi aña nos pais a crece economicamente, pero hopi bes a mira un descrepancia entre e progreso rond di henter e areanan ey compara cu e bario y centronan di ciudad. P’esey nos Gobierno a pone como meta importante pa nos percura cu no solamente nos ta orguyoso di e forma con industria turistico ta presenta su mes na mundo, pero cu nos tambe por ta orguyoso di nos isla, di su areanan publico, e scolnan, barionan y cu tin atencion pa e calidad di bida cu nos kier pa tur nos ciudadanonan den tur nos barionan,” Eman a duna di conoce.

Na mesun momento a señala cu tin mas proyecto andando pa e bario y a menciona cu pronto lo cuminsa cu construccion di e edificio di MFA, cu lo ubica Oficina Auxiliar di Gobierno, cu lo promove e desaroyo comunitario den e bario. Den cuadro di e mesun maneho aki, a menciona cu e cooperacion maximo cu ta brindando na veldnan deportivo y ya caba ta buscando un sitio adecuado na Jan Flemming pa bini cu un “Kruyff Veld” cu ta yuda mantene muchanan den e caminda corecto. “Asina dunando un apoyo na organisacionnan cu kisas no ta asina grandi manera otronan, pero cu tambe ta haciendo un trabou comunitario hopi importante na Santa Cruz,” Prome Minister Eman a bisa para dilanti Misa Immaculada Concepcion na Santa Cruz. Y a agrega cu “graf di Libertador Betico Croes lo haya atencion special, lo pone banki y miho iluminacion”.

Expresionnan haci den e articulo aki no necesariamente ta refleha opinion di ArenaPoliti.co