Oranjestad – Aruba: 11 Mei 2015: Siman a habri cu tratamento di presupuesto 2015, unda cu Minister di Finanzas, Angel Bermudez conhuntamente cu Minister President tabata na turno pa contesta e preguntanan di Parlamento. E reunion a continua riba diamars y pa oranan laat di anochi e presupuesto 2015 a keda aproba den Parlamento cu 12 voto na fabor y 9 contra.

E 24 desicionnan cu a wordo tuma den conseho di minister dia 25 di Augustus di aña pasa keto bay ta e base di presupuesto 2015, asina e mandatario di finanzas a sigura durante e reunion publico, sin laga afo e plafond di gasto di 135 miyon florin cu e Gobierno a cumbini cu e ‘balans budget. Ademas di esaki Minister Bermudez a indica cu Gobierno ta riba e ruta di presupuesto cu ta resulta na un deficit di 3.7%, pues p’esey no tabata tin ningun duda pa mantene e presupuesto aki.

Durante e reunion publico, miembronan di Parlamento a propone un mocion importante pa trece un ley cu ta regla e maneho pa cobra studiantenan cu ta ricibi beca di Aruba asina cu nan termina nan estudio. Fuera di esaki tambe a entrega 20 mocion mas durante e tratamento di presupuesto.

Ademas, dos amienda a wordo proponi riba e presupuesto, uno pa introduci e aña aki un ‘Ombudsman’, cual ta un funcionario independiente cu mester atende kehonan di comunidad tocante calidad di servicio di e aparato gubernamental y na mes momento tambe a entrega un amienda caminda ta aumenta e BAZV su porcentahe entrante di 1 Juli cu 1%, mientras cu ta reduci e prima di AZV cu empleadonan ta paga di 2.6% pa 1.6%. “E cambio aki ta anticipa riba e movimiento di impuesto directo pa indirecto y e lo reduci e deficit presupuesta te cu 3,4%!”, Minister Bermudez a informa.

E mandatario di finanzas ta satisfecho cu e aprobacion di e presupuesto y ta spera cu pronto por conclui e proceso aki cu firma di Sr. Gobernador, Fredis Refunjol. “Asina cu nos finalisa e proceso aki oficialmente cu e firma di Sr. Gobernador, nos lo sigui traha riba demas aspecto cu tambe ta sumamente importante manera e reforma fiscal entre otro”, e dignatario expresa na final di anochi.

Expresionnan haci den e articulo aki no necesariamente ta refleha opinion di ArenaPoliti.co