Den e ultimo dos simannan riba tereno sindical nos por a observa dos cambio di mando, debi na eleccion di presidente y directiva nobo.
UPP ta cuminsa pa felicita dirigentenan nobo, di FTA, sr. Hubert Dirksz, y di SPA, sr. Juancho Gomez, cu nan eleccion como presidente.
Cu cambio di dirigencia aki UPP ta spera tambe di por mira un buelta den desaroyo sindical aki na Aruba, sigur mirando e rol cu varios sindicatonan a bin ta desplegando den e ultimo añanan aki na Aruba.
Nos tur sa cu den e ultimo añanan, bou di capa di Dialogo Social, varios sindicato a coopera, of miho bisa a colabora cu hopi decision cu directamente a y ta afecta directamente y negativamente e clase trahador y e pueblo.
Cu atencion nos a sigui e discurso di e.o. sr. Dirksz cu a bisa cu e Dialogo Social no a resulta manera nan a spera, y cu mas bien gobierno a bin ta uza e plataforma como un “dekmantel” di hopi decisionnan impopular.
Es mas, den e ultimo aña aki nos por mira cu mas decisionnan a wordo tuma, unda cu no ta ni yama e partnernan social, ni sikiera pa comunica esaki na nan.
Pero cada biaha ta bay bek na decision cu algun aña atras a wordo tuma y anuncia.

Pa UPP sigur ta hopi importante pa por tin dialogo.
Un di e puntonan di salida di e programa di UPP ta cu mester garantisa e derecho politico di nos ciudadanonan, unda no tin espacio pa e cultura di miedo, mientras cu transparencia y un sistema democratico renoba y reforma, ta garantisa un democracia bibo pa un y tur.
Y pa esaki ta importante pa implementa e sistema di “Dialogo Nacional” den un forma institucionalisa, unda cu tur sector di nos comunidad ta representa.
UPP ta na fabor pa institui esaki por medio di ley, na unda cu na comienso di gobernacion ta determina kico ta e puntonan esencial cu ta bira puntonan di discusion.
UPP ta scohe pa e modelo cu Sr. Betico Croes, d.f.m. a uza den pasado, esta e RCOA, unda cu tur gremio, incluso partidonan cu y sin representacion, ta representa.
E instituto “Dialogo Nacional” no mester bira un simpel appendix di gobierno, na unda cu ta cierto gruponan, sin representacion necesario ni cuantitativo for di e comunidad, aparentemente ta “decisionmakers”.
Den e cuadro aki tambe lo tin consultanan habri cu esnan directamente involvi, sea na nivel di bario of na nivel di region.
Den e modelo aki e rol di Parlamento di Aruba ta wordo respeta y ta keda e organo cu na final, despues di a participa tambe den un di e dialogo nacional, ta fiha su posicion.
Gobierno su trabou ta pa ehecuta.
Importante ta cu e “Dialogo Nacional” aki ta wordo structura via di ley, mientras cu ta mara tur decision basa riba investigacion previo, pa asina trata di un decision responsabel.
Mirando e situacion cu Aruba ta aden actualmente, ta imperativo pa uni nos comunidad, pa asina conhuntamente sali padilanti cu solucionnan duradero. Na e momentonan aki parce cu cada ken kier bay nan direccion, mientras cu Aruba ta na rand di un abismo.

E concepto di Dialogo Social di Mike E. poco poco ta muriendo.
Tanto Camara di Comercio, como varios sindicatonan, AHATA y ATIA, tin nan criticanan riba e desaroyo di e Dialogo Social. Awor numa parce cu ta lantando for di soño despues di - sea consciente- of inconscientemente - a permiti Mike E. malusa e sistema aki.

Un biaha mas UPP ta felicita ambos sindicato cu cambio di dirigencia, y nos ta ripiti cu nos ta spera cu e cambio aki tambe lo percura pa e cambio di e desaroyo sindical aki na Aruba.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 2, 2015

Expresionnan haci den e articulo aki no necesariamente ta refleha opinion di ArenaPoliti.co