ORANJESTAD – “Sumamente feliz”, asina Parlamentario Desiree Croes a expresa di ta sinti ora cu diasabra mainta el a presencia e trabounan cu ta wordo haci den compleho di cas di FCCA na Sabana Basora Noord. “Tremendo nos bario mester di esey,” Croes a indica como un habitante di e districto. E ta gradici e atencion cu tanto Prome Minister Mike Eman, pero tambe otro miembronan di e Gobierno actual ta dunando na e bisindario pa por atende e retonan social cu ta existi.

Croes ta reconoce cu e bario recientemente ta den un luz negativo pa motibo di comportacion di hobennan. Esaki ta perturba e sinti di trankilidad den e bario, sin embargo, Gabinete Mike Eman II ta kere den e boluntad di e propio habitantenan pa bin cu un cambio positivo. Pa e motibo ey ta brindando cooperacion pa medio di diferente Ministerio, departamento y programa.

Algun dia atras Minister di Husticia Arthur Dowers personalmente a recore e cayanan di Sabana Basora y a papia cu e habitantenan. Di su banda, Minister di Asuntonan Social y Hubentud, Drs. Paul Croes, tambe a haci un acercamento pa brinda e asistencia necesario pa mehora e calidad di bida den e bario.

Prome Minister Mike Eman a haci un bishita den cuadro di Accion di Bario caminda a tuma nota di tur loke por mehora, como por ehempel e veld di deporte cu den fin di siman a wordo drecha. Adicionalmente, e mandatario a percura pa a haci un limpieza intensivo di sushi, mondi y tambe a drecha e iluminacion publico pa crea un ambiente mas agradabel y sigur. Diasabra mainta, personalmente Premier Eman tabata verf vloer di e cancha di basket hunto cu muchanan di e bario.

“Esaki ta un comienso y muchanan mes ta haciendo e trabou y nan ta haya un balor extra pa loke ta den nan bario. Ta spera cu pronto lo tin mas actividad pa duna nan cosnan positivo pa haci,” Parlamentario Croes a bisa. Esey ta un aspecto cu ta canando ya cu tin varios adulto cu a bin dilanti como boluntario pa ehecuta programanan di actividad deportivo, recreativo y di expresion artistico.

Segun Parlamentario Croes, “akinan nos ta wak un gobierno dunando e bon ehempel. Ora Minister ta drenta den bario bo ta wak e positivismo cu e ta trece cu ne. Pa prome biaha den historia nos tin un Prome Minister cu ta berdaderamente e mes ta haci e trabou. E por ta algo chikito, pero nan tin un domino efect cu ta pasa e energia positivo pa otro y bo ta wak esey den cada bario cu e Minister ta bishita.”

Expresionnan haci den e articulo aki no necesariamente ta refleha opinion di ArenaPoliti.co