Cada dia accionan y medidanan di AVP ta papia un idioma cla. E metanan cu AVP ta papia di dje ta mas bien logronan egoista excluyendo e bienestar y un futuro solido pa nos pais. Ta di lamenta cu ora AVP a bin na poder a lubida e pueblo den sentido cu un cantidad di promesanan tawata yena cu aire. 

Ta di lamenta cu e cambio cu tanto a papia di dje a cai na aroz con coco. A papia masha gran cos di stop corupcion, abuso di poder, negligencia total di Pueblo y enrikesimiento di "friends and family". Awendia tin un cantidad di caso nan iregular y cuestionabel sosodiendo den Gabinete Eman. Abuso di autoridad ta keda chikito pa describi e tantisimo bagamunderianan cu a wordo treci padilanti den prensa varios biaha cu ta sosodiendo bou di diferente ministerionan entre otro riba projectonan dudoso, riba tereno di otorgamento di permiso, e proceso di permiso di trabou ,otorgamento di tereno y asina e lista por sigui. Contrario na e enrikicemento di friends ands family cu tanto AVP a referi na dje awendia esnan di mas serca so ta haya cierto beneficionan y preferencia cuminsando na coordinadornan y kende sa si na sponsornan di campaña tambe. Tur esaki ta continua na sosode cu placa di pueblo desde cu Gabinete Eman a tuma mando di nos pais. Por papia di enrikicemento tambe ora cu e propio parlamentarionan di AVP den 6 minuut kier a trata un ley pa mehora nan compensacionan. Akinan ta unda e cara real di miembronan di AVP ta sali na cla pasobra cu loke pasa cu pueblo no ta importa nan un comino!

Enbes cu lider di AVP stop di mancha partido MEP cu "politica coruptivo" e lo mester cuminsa wak den su propio seno y husga pakiko pais Aruba ta den un CAOS financiero asina grandi?! E mester ta honesto cu pueblo pa bisa cu ta danki na nan consentimento y contribucion nos tin un situacion financiero cu ta un desaster. Danki na e situacion aki Aruba mester di placa pa scapa nan "pellejo" como parlamentarionan cu no a hasi nan trabou di controla y cuestiona gobierno. E grupo di ja-knikkerij cu lider di fraccion AVP ta na mando di dje hunto cu tur miembronan di ministerraad lider door di prome minister a crea un crisis den nos comunidad! Sino e mester splica pueblo pakiko cada rato tin aumento di belasting, cobransanan extra of reforma fiscal na caminda! Reforma fiscal ta significa nada mas y nada menos cu MAS BELASTING. Kier bende na pueblo cu ta simplificacion pero pueblo mester hasi su mes e siguiente pregunta: reforma fiscal ta bai trece mas o menos placa? E ta obvio cu e medidanan existente no ta treciendo e placa necesario pasobra e buraco financiero crea door di mal maneho ta grandi!

E mal maneho financiero di pais Aruba ta grandi y esaki ta pone cu Gabinete Eman ta biniendo cu mas medidanan. Esakinan autonaticamente ta perhudica pueblo y pone cu prijsnan ta subi creando un efecto inflatorio cu por ta devastador! Pesei e ta ironico cu lider di fraccion di AVP mes ta admiti cu ora AVP a kita e prome mitar di BBO a wak cu e prijsnan den supermarket y tiendanan no a baha toch ta sosteniendo un avalancha di medida cu por afecta pueblo drasticamente. E ta cultura di AVP pa bisa cu ta duna pueblo algo pero e realidad cruel ta cu na e momentonan aki mas y mas cuidadano ta sintiendo e peso financiero di tur e medidanan di e gobierno aki

No falta nada mas!
Despues cu pueblo a tolera 6 aña di gobierno di AVP y ta wantando castigo, abuso sin fin ta ora pa pone liña final. Netamente esaki ta loke bo ta scuchando eyfor cu e maneho anti-pueblo di AVP a crea desilucion grandi mei mei di comunidad fadando tur cuidadano. Falta poco y e momento ta serca cu pueblo lo bai duna e gobierno aki su laba y strika. Contrario na e creencia di integrantenan di AVP cu pueblo lo ta contento ta reinando intrankilidad , preocupacion y inseguridad pa cu futuro cual pueblo lo bai reken-af na mal manera cu AVP!

Expresionnan haci den e articulo aki no necesariamente ta refleha opinion di ArenaPoliti.co