Medida # 9 CAFT 

ORANJESTAD – Lider di MEP y fraccion di MEP a reuni cu Banco Central diahuebs ultimo pa haya un mihor bista di e situacion financiero di pais Aruba. Varios aspecto a wordo splica.

CONSUMER CONFIDENCE

Entre e puntonan discuti ta e preocupacion di Banco Central cu e cuidadano no tin confiansa den e desaroyo economico di nos pais. Cuidadanonan ta pesimista pa cu futuro di nos pais. Esaki por trese cun’e cu nan no ta hasi inversionnan grandi, nan no ta cumpra cosnan di balor, etc. y esaki ta afecta nos economia. Tambe a splica cu no ta tur entrada ta bayendo manera premira, y cu esaki lo por nifica cu mester bin cu ahuste, of medida.

TURISMO

E desaroyo di turismo tambe ta mustra su riesgonan, y aunque den cantidad ta parse cu turismo ta aumenta, bo no ta mira esey tradusi den entradanan. Mas y mas turistanan ta kedando na casnan di hende, y menos den hotel. Esaki ta un senjal cu e mercadeo di ATA no ta efectivo pasobra e mercadeo cu ta costa hopi miyones, ta dirigi na atrae e turista cu ta gana mas placa y ta gasta mas. Pero aparentemente Aruba ta atraendo otro grupo di turista.

REFINERIA

Banco Central a hasi un analisis di e beneficionan di re-apertura di refineria compara cu un hotel na San Nicolas (Bahia), y a yega na e conclusion cu e benficionan di re-apertura di e refineria ta mucho mas grandi cu un hotel.

MEDIDA FINANCIAL TRANSACTION TAX

Banco Central ta preocupa pa e medida menciona den e lista di medida di CAFT,  e financial transaction tax, of manera nan ta yame awor: financial transaction levy. E medida aki ta # 9 riba e lista di 24 medida, cu mientras tanto a bira 26 medida. Segun e lista di medida e belasting nobo aki mester wordo trata den parlamento den e siguiente simannan, pa drenta na efecto otro anja, y lo mester trese den caha di gobierno 52 miyon florin. Banco Central, mescos cu otro gremionan ta CONTRA  e belasting aki, pa varios motibo. Punto principal pa Banco Central ta cu no por usa e tipo di belasting aki pa algo duradero, y ademas, si tur hende stop di usa banco y hasi tur transacción cash, esey tin su riesgonan cun’e tambe. Parlamento te dia di awe no a haya e conseho aki pa mira. Lider di MEP Evelyn Wever-Croes ta satisfecho cu Banco Central a ricibi fracción di MEP.

Expresionnan haci den e articulo aki no necesariamente ta refleha opinion di ArenaPoliti.co