Centro di cuidad poco poco ta wordo bandona 

ORANJESTAD -- Lider di MEP Evelyn Wever Croes hunto cu coleganan di partido MEP a bishita diferente tienda den caya Betico Croes siman pasa y a papia cu empleadonan, donjo di tiendanan y clientenan. No tabata tin un cu no tabata preocupa. Tur hende ta mira e desaroyo nobo cu e parkeermeternan a causa, como un problema hopi serio. Algun hende ta pensa cu talves e idea riba su mes ta bon, pero no e forma con ela wordo implementa.
Ya caba desde cu a bin cu e tram, caya Betico Croes tabata mustra morto. Hendenan no tabata bin den caya mas. Un comerciante a hasta bisa nos cu tempo cu caya Betico Croes tabata na werki mes tabata bin mas hende bin cumpra, cu despues cu el’a keda bunitay a haya e tram.
Otro a compara e tram cu show di Hollywood, pero sin cu tin hende interesa den mira e show. En todo caso prácticamente tur hende cu nos a papia cun’e ta lamenta e placa cu ta wordo benta afo cu e tram!
Varios comerciante a compara e plan di e gobierno anterior cu esun di e gobierno aki, y ta bisa cu e gobierno di AVP a faya, pasobra e tram tabata e peor decision c unan por a tuma.
Y awor, en bes di duna centro di Playa un bida, ta saca e ultimo oxygeno di centro di Playa, cu e parkeermeternan.

Varios tienda tabata tin hopi speransa cu diasabra benta lo a bai mihor. Berdad por a nota cu diasabra tabata tin poco mas hende cu a bai Playa, compara cu den siman, pero tur a para riba parkeerplaats gratis di banconan. Esey ta mustrabo cu e cuidadano NO ta dispuesto pa paga, y cu esnan cu a traha e proyecto di parkeermeter a traha esaki sin hasi un estudio debido. E benta di diasabra no tabata di compara tampoco cu benta di antes riba diasabra. Esey ta bisabo cu apesar cu hendenan sa cu diasabra tin hopi lugar gratis pa parkeer, toch nan a wordo spanta for di caya Betico Croes. Tin un temor inculca den pueblo pa bin playa, pasobra nan ta core riesgo di haya boet of klem, y hasta nan por haya nan ta paga 275 florin si nan hiba bo auto.

TRAM NOBO
Aparentemente awor cu ta cobra pa parkeermeter ya gobierno ta cla pa bin cu un di 4 tram. Ta increible cu un prome minister ainda ta deliria, sin cu e ta realisa cuanto danjo su sonjonan absurdo a ocasiona caba. Aruba no mester di un tram mas. Aruba mester di alivio. No tanto medida asina.
Nos di MEP ta exigi cu mester bin ALTERNATIVA, no MEDIDA so contra nos pueblo. Minister Otmar Oduber y Mike Eman a faya den nan vision. E proyecto aki ta devastador pa nos comunidad. Pueblo kier por drenta caya Betico Croes bek libremente. Esnan cu ta traha den caya kier por yega nan trabou trankilamente. Nos di MEP lo lucha pa esaki bira un realidad.

Expresionnan haci den e articulo aki no necesariamente ta refleha opinion di ArenaPoliti.co