Gerrit Croes (MEP): Evelyn Wever-Croes, nos lider lo ta e solucion cu Aruba mester na e momento aki pa sali for di e scuridad
Den ki tereno cu bo ta desaroya bo mes, bo mester tin cierto caracteristicanan cu ta relevante pa bo por cumpli. Si nos papia di liderazgo di un partido - fuera di e cualidadnan necesario pa por cumpli cu bo funcion – bo mester tin e cualidadnan superior cu lo guia bo den e proceso pa dirigi bo partido.
Aki mi por papia di honestidad, sinceridad,transparencia y sin duda bo mester tin amor pa e causa y pa bo pueblo.Condicion necesario pa bo por sinti e sentimentonan di bo pueblo. E sensibilidad aki ta esun cu ta haci nos Lider Evelyn Wever-Croes Grandi! Sin duda, un dama educa, cu amor pa su famia, su amigonan, su coleganan y algo cu ta midi responsabilidad y compromiso di un persona ta e amor pa su yiunan y su famia!! Manera bo ta stima y dedica na bo famia,bo yiunan y bo coleganan,asina mes e lo refleha den e compromiso pa cu bo pueblo y bo siguidornan!
Si bo puntrami riba liderazgo di MEP, mi lo bisa bo categoricamente cu actualmente y pa hopi aña mas nos lo no mira un persona asina dedica, comprometi y cu un amor inmenso pa cu e pueblo aki y dispuesto pa traha dia y anochi (manera e ta haciendo caba!) pa logra trece bienestar y un mihor futuro pa cada un di e personanan cu ta biba riba e pida baranca aki cu yama Aruba!
Nos partido MEP lo sigui bao liderazgo di sra. Evelyn Wever-Croes, p’asina nos garantisa bon gobernacion y transparencia den ehecucion di tur proyecto cu lo beneficia henter nos pueblo!
Awe, den tur e turbulencia y mal maneho financiero crea pa e gobierno na mando, no tin mihor candidato pa soluciona y trece alivio na esnan mas vulnerable den nos sociedad.
Evelyn como candidato, como parlamentario y como lider a mustra su capacidad y cualidadnan pa bira e promer muher cu lo ocupa e puesto di Promer Minister di pais Aruba. Como abogado y como fiscal di belasting mi ta sigur cu e lo sa di hiba nos isla na un siguiente nivel, na unda nos finanza lo mira un solucion, nos economia lo florece y nos pueblo lo haña alivio pa tur e caos crea di mala fe pa e actual Promer Minister y su gobierno.
Evelyn Wever-Croes, nos lider lo ta e solucion cu Aruba mester na e momento aki pa sali for di e scuridad. SOLO TA SALI PA NOS TUR!
Expresionnan haci den e articulo aki no necesariamente ta refleha opinion di ArenaPoliti.co