Como ultimo parti di su turno durante e conferencia di prensa semanal di Gabinete Mike Eman II, Prome Minister a referi na e argumento di su criticonan cu e no ta un contratista. E mandatario no ta sorprendi pa e ponencia aki di oposicion, pero toch ta lamenta cu no por wak mas leu cu e rivalidad. No por duna balor na e mensahe principal di su accionnan, cu ta pa stimula y motiva e sentido di cooperacion y solidaridad den nos comunidad; algo cu e ta haci den su tempo priva.

“Tur diasabra mi ta purba den e mesun ora, cu no ta di gobernacion, pero priva,” a bisa na media local. No ta como Prome Minister mas, cu un mas cuashi of bloki den su man, pero si ta duna un señal na loke ta considera importante, esta solidaridad entre esnan hoben y mas grandi, entre rico y esnan di menos recurso, entre un bisiña cu otro. “Esey bo ta haci solamente cu e bon ehempel y ta parti di e proceso cu ta stimula y motiva e cooperacion ey den un comunidad,” segun Premier Eman.

El a sigui na enfatisa e punto cu “unda cu nos mes por duna ehempel, nos ta hacie cu placer y nos lo sigui hacie tambe paso nos ta kere cu nos ta contribui na un sociedad caminda tin un bon balans entre e aspecto material y e aspecto cu ta realmente ta duna substancia na bida cu ta e sentido di ‘caring and sharing’.”

E trabou di gobernacion na ningun momento ta keda poni un banda dor di e accionnan comunitario cu su persona ta haci. Miembronan di Gabinete Mike Eman II ta traha consistentemente y di un manera dedica na e progreso di nos pais. Tin varios ehempel di esaki cu por trece dilanti.

Aruba ta habri 2015 riba cifranan di turismo hopi prometedor, segun Prome Minister Mike Eman. El a menciona proyectonan sumamente grandi manera e renobacion y ampliacion di hospital, proyecto di waf na Barcadera, Green Corridor ta concretisando, Ringweg ta den destaho publico, renobacion di seis scol mas cu ta cerca Fondo Desaroyo Aruba.

Tambe nos Minister President ta confirma e continuacion di esfuersonan pa, den bon dialogo, keda mehora e poder di compra di nos cuidadonan y “haci Aruba un pais berdaderamente sostenibel, no solamente den termino di energia ecologicamente, pero tambe socialmente.” Asina Prome Minister a finalisa bisando. Proyectonan comunitario, sea ta di BoBario of individual por sigui contra cu e sosten di su persona.

Expresionnan haci den e articulo aki no necesariamente ta refleha opinion di ArenaPoliti.co