Recipiente di Medaya di Nacionnan Uni 

ORANJESTAD – “Henter famia ta inmensamente orguyoso y emociona,” asina ruman muhe di Michael Kip, a expresa momentonan despues di e ceremonia. Y nan tin bon motibo pakico. Te unda ta conoci, ta prome biaha cu un Arubiano ta ricibi un reconocemento pa su servicionan na e misionnan di paz di Nacionnan Uni.

‘Dag Hammarskjöld’  ta e nomber di e medaya di reconocemento. Secretario General a establece e reconocemento aki na december 2000 como un homenahe postumo  na miembronan di misionnan di paz cu a perde nan bida durante servicio cu un operacion di paz bou di e control operacional y autoridad di Nacionnan Uni.

E premio a keda, pa 10 aña den posesion di Departamento di Relacionnan Exterior caminda algun dia atras, e directiva nobo a descubri su existencia y inmediatamente a cuminsa coordina e presentacion oficial. Na e ceremonia di entrega, famia y amigonan a recorda e bida y legado di Michael Kip y tabata masha contento cu e manera con nan a ricibi e medaya.

“Nos ta kere cu mirando e persona di Sr. Mike Eman cu ta creyente den Nacionnan Uni, e trabou cu nan ta haci y den e yudansa cu semper bo mester duna bo comunidad tanten bo ta den e posicion pa por haci esey, ta un circulo ta completo. Nan ta dos persona cu a kere den e mesun idealnan,” asina Jeanune Kip a comenta.

El a añadi cu e mas importante di tur esaki “ta pa realisa cu si bo tin e deseo di haci mas cu simplemente pa bo mes, cu bo ta pensa cu bo kier bay afo y duna di bo mes pa yuda esnan den mas necesidad, esey ta posibel. No ta paso bo ta bin di un isla chikito, al contrario, lantando aki cu e capacidad di mas idioma, mas porta ta habri. Nos tin un mentalidad na Aruba cu nos por haci tur cos y esey ta importante.”

Michael Kip cu apenas 22 aña a cuminsa su carera na Nacionnan Uni na New York. Esey tabata na 1986 cu e Fondo pa Muchanan, esta UNICEF. Su prome experiencia riba tereno pafo di e basenan di UN tabata pa un par di luna den 1993 cu e Operacion di Nacionnan Uni na Mozambique. Di eynan, el a bay pa Baghdad caminda el a keda te 1997, sigui pa Belgrado te 1999. E mesun aña ey e siguiente Mision di Paz di Nacionnan Uni a hiba Michael pa Kosovo pa casi un aña.

Despues, na 2000, el a regresa e base na New York caminda el a traha pa 4 aña mas. Y manera, su ruman a conta, e spirito di Michael tabata pidi pa e bay bek riba tereno. E ocasion ey a presenta cu e Mision di Nacionnan Uni na Liberia caminda despues di algun luna, el a bira malo y fayece. Den total, Michael a traha 18 aña cu Nacionnan Uni, 11 pa UNICEF y 7 den Misionnan di Paz di UN.

Apesar di a biba y traha leu y biahando constantemente, Michael Kip tabata mantene un contacto estrecho cu su famia na Aruba y no tabatin un Carnaval cu el a keda sin bay aden. Den su 40 aña di bida, el a disfruta tur loke el a haci. El a disfruta di su trabou, di su famia y di su isla.

Expresionnan haci den e articulo aki no necesariamente ta refleha opinion di ArenaPoliti.co