Fraccion MEP: A entrega pregunta na Minister di Husticia: Melvin Tromp ta haya trato preferencial na man di Ministerio publico?
Recientemente a sali publica den un medio di prensa cu parlamentario Melvin Tromp lo tawata envolvi den un caso di maltrato. Segun informacionan nos a compronde cu e parlamentario lo a maltrata un cabayero publicamente den area di lineair park. E cuidadano cu a wordo maltrata malamente a hasi entrega di un keho oficial na autoridad policial. Mester enfatisa riba e hecho cu e cuidadano a para te na hospital y un rapport medico ta indica cu e lo a haya slanan fuerte.
Nos a compronde cu parlamentario Tromp ta cana den comunidad bisando cu niun hende no por hasi'e nada toch debi cu e tin bon lasonan cu esnan den top di Ministerio publico. Ta parce cu den un forma e tin rason pasobra ya caba 2 siman a pasa ye parlamentario ta liber manera un parha si cu un dia a detene y cuestiona su comportacion cu no ta apto pa un parlamentario.
Relaciona cu esaki nos fraccion a dicidi formalmente pa hasi e Minister di Husticia preguntanan tocante e caso aki. Den e serie di preguntanan cu nos a hasi na Minister di Husticia ta bini padilanti pe duna splicacion con a trata parlamentario Melvin Tromp den e asunto aki. Tambe nos fraccion kier wordo informa si eventualmente e parlamentario lo bai wordo sanciona pa su acto. Nos ta spera cu e minister en cuestion por contesta y clarifica tur nos preguntanan pasobra husticia no conoce color politico ni tampoco posicion. Nos ta condena cu un parlamentario ta comete un acto repudiabel y ta cana los sin cu minister di husticia ta hasi algo.
Expresionnan haci den e articulo aki no necesariamente ta refleha opinion di ArenaPoliti.co