E siman aki atrobe a keda demostra cu no por confia y tampoco conta cu palabracionnan haci pa Presidente di Parlamento ya cu e mes no ta duna ningun balor na su palabra. 

Presidente di Parlamento segun su prerogativo a stipula fecha y ora pa asina Parlamentario por entrega preguntanan por escrito riba entre otro e Presupuesto 2014 cu pronto mester bolbe keda trata den un reunion publico pa Parlamento.

Asina e Presidente a fiha e fecha di 19 november 2014 na fin di dia pa entrega di pregunta. Pero di un dia pa otro a core cambia agenda Parlamentario y a yama un Comicion Central pa atende 9 ley parew, entre nan presupuesto 2014, y eyden e Fraccion di AVP a haya ta bon pa dicidi den mayoria cu nan no ta bay haci ningun pregunta den e reunion di Comicion Central y tampoco lo entrega ningun pregunta por escrito riba e Presupuesto 2014. Consecuentemente e mayoria aki a dicidi pa manda un blanco verslag na Gobierno. Cu e decicion aki e mayoria a overule e decicion di Presidente di Parlamento pa haci entrega di pregunta na e ora stipula y a perhudica full opocicion di MEP y AVP pa entrega preguntanan cu nan si a percura pa formula.

Remarcabel ta cu net awor cu nos Pais ta den un crisis financiero, awor cu tin un KB riba nos cabes, awor cu CFT ta bira permante, net awor cu tin mas di 200 miyon na medida, cu pension di grandinan ta wordo perhudica, net awor bo ta haya un Presidente di Parlamento cu ta wordo maneha pa e mayoria di AVP y ta perhudica opocicion di haci su trabou. Esaki ta un berguensa y ta mustra cu e Presidente aki no ta fungi como un Presidente di Parlamento pa henter Parlamento sino solamente pa e fraccion di AVP cu na nan turno ta harlekin di Minister Mike Eman.

Ta tristo pa mira e decadencia den Parlamento di Aruba na unda e mayoria a lubida cu ta hustamente via preguntanan e control riba Gabinete Eman mester wordo haci. Keda sin haci pregunta, ta keda sin controla y sin cumpli cu e trabou parlamentario. Sinta den stul pa bisa cu bo ta presente den reunion y keda sin formula pregunta riba e ley di mas importante di nos Pais, ta mescos cu wordo paga sin traha na beneficio di nos Pais.

Pesey e ta un berguensa pa bolbe constata cu esun na cabes di Parlamento no conoce su funcion y cu e mes no ta duna balor na e palabra di un Presidente di Parlamento.

20 november 2014

Expresionnan haci den e articulo aki no necesariamente ta refleha opinion di ArenaPoliti.co