Evelyn Wever-Croes (MEP): Apesar cu 2016 ta anja di crisis Gabinete Mike Eman tin 338 coordinador riba payrol cu salario di 8 mil florin
ORANJESTAD – Fraccion di MEP ta hasiendo tur lo posibel pa informa henter comunidad tocante e presupuesto 2016 di Gabinete Mike Eman. Un di e puntonan cu semper MEP a keda enfoca riba dje ta con ta posibel Gabinete Mike Eman tin asina tanto cooridnador den sericvio!
Awe nos ta analisa e presupuesto 2016, riba e gastonan di salario di coordinadornan.
Cantidad total di coordinador pa 2016, segun e presupuesto cu Mike Eman a manda Parlamento, ta 338. E gastonan total ta 32.5 miyon florin. Esey ta duna un average di salario di 8 mil florin pa cada coordinador. Riba e grafico adhunto por mira esaki mas detaya.
Algun ta gana poco menos, algun ta gana poco mas. Pero e average ta 8 mil florin pa cada coordinador. Esaki ta un bofta den cara di hopi di nos hobennan cu ta lucha pa caba nan estudio, pero no por haya trabou. Otronan, sin ningun studio, ta yega y gana 8 mil florin pa luna.
SOLUCION DI MEP
MEP ta kere cu prome ministernan mester baha gasto y despues bo por pidi pueblo pa hala faha mara. E plan di MEP ta simple:
Stap 1: baha e cantidad di minister di 9 pa 7 minister, y bo ta scapa 17 miyon florin
Stap 2: baha e cantidad di coordinador y bo ta scapa 24 miyon florin
Stap 3: baha e gastonan di biahamento, huurmento, propaganda y abogado, y bo ta scapa 9 miyon florin
Asina den 3 stap sensiyo, bo ta scapa 50 miyon florin SIN cu bo mester bai na pueblo cu mas medida.
Expresionnan haci den e articulo aki no necesariamente ta refleha opinion di ArenaPoliti.co